LA COUMUNIOUN DI SANT

Davalavo, en beissant lis iue, Dis escalié de Sant-Trefume ; Ero à l'intrado de la niue, Di Vèspro amoussavon li lume.

Li Sant de pèiro dôu pourtau, Coume passavo, la signèron, E de la glèiso à soun oustau Emé lis iue l'acoumpagnèron.

Car èro bravo que-noun-sai, E jouino e bello, se pou dire ; E dins la glèiso res bessai L'avié visto parla vo rire ; Mai quand l'ourgueno restountis E que li saume se cantavon, Se cresié d'èstre en Paradis E que lis Ange la pourtavon !

Li Sant de pèiro, en la vesènt Sourti de-longo la darriero Souto lou porge trelusènt E se gandi dins la carriero.

Li Sant de pèiro amistadous Avien près la chatouno en gràci ; E quand, la niue, lou tèmsesdous, Parlavon d'elo dins l'espàci.

— La vourriéu vèire deveni, Disié sant Jan, moungeto blanco, Car lou mounde es achavani E li couvent soun de calanco. —

Les Rêves.