INTRODUCTION XXIII

devoit déférer, chose estant grandement à la descharge de tous ses bons seigneurs et amis. Pourtant a ajousté trois fueilles tant pour les raisons susdictes qu'aussi pour respondre à quelques objections légères, ce qu'il a espéré vous devoir estre fort aggréable, d'autant que ne voudriez aucunement qu'il fust accoulpé des fautes que pourrez voir audit exemplaire qu'il vous présente, d'autant aussi qu'il a faict mention nommeement des fueilles que luy avez faict rimprimer, désavouant totalement les autres. Sur laquelle espérance se fiant ledit Henri, et aussi en tant que lesdites trois fueilles n'estoyent œuvre nouvelle, mais annexées audit livre, il n'auroit estimé estre aucunement besoin d'en avertir Vos Excellences, à quoy il n'eust voulu faillir, comme aussi vous avez peu congnoistre combien il s'est tousjours efforcé de faire son plein devoir en toutes choses qu'il a sceu estre de vostre vouloir. Or est-il ainsi que depuis il a entendu que pour quelques autres considérations lesdites fueilles vous ont despieu, et mesmement en tant qu'il seroit demeuré quelque chose en ladite table ou indice qui pourroit estre trouvé estrange par ceux qui ne voudroyent prendre la pêne d'aller voir le passage sur le livre. Voyant donc que sans y penser et mesmement en pensant bien faire et chose qui vous seroit aggréable, au contraire il vous a donné occasion d'estre offensez à l'encontre de luy, il vous supplie très humblement ne luy imputer ce que dessus à malice ni à rébellion, ainz plustost luy pardonner ce qu'il a faict par mesgarde et à bonne intention, comme a esté dict. Espérant que Dieu luy fera la grâce ci-aprés de ne tumber point en pareille faute, ains au contraire congnoistrez qu'il aura très bien faict son proufit de vos bénignes remonstrances. Et quant ausdictes fueilles, il en fera ce qu'il vous plaira en ordonner, comme aussi, depuis qu'il a entendu qu'elles ne vous plaisoyent, il