CHAPITRE XVI

lent, n'osant ou ne pouvant personne y mettre l'enchère. Mais outre tout ceci, il faut noter que sur la somme baillée premièrement par le créditeur, il aura faict entrer telles pièces d'or et d'argent qu'il luy aura pieu, de poids ou non, avec chevaux, ou poignars d'argent, ou autres telles drogues, pour tel pris qu'il luy aura semblé bon. Que direz-vous, lecteur, de ceste façon d'usure? pensez- vous que quand les diables se voudroyent mesler de ce mestier, ils en peussent faire d'avantage? Quant à moy je ne le pense pas. Et toutesfois la pitié est encore plus grande en l'usure qui s'exerce à l'endroit des povres gens : lesquels les usuriers n'apovrissent pas ainsi (veu qu'ils sont desjà povres), mais leur coupent la gorge, en leur ostant le boire et le manger, par leurs monopoles : desquels aussi on voit que ces malheureux trouvent tous les jours inventions nouvelles : jusques à aller audevant des charrettes et des basteaux qui apportent des vivres, et corrompre les chartiers et les basteliers pour les faire retarder. Voire ay souvenance de m'estre trouvé en lieu où on disoit que tels monopoleurs avoyent faict emmener les chevaux, faisans semblant d'en avoir besoin pour quelque affaire, que depuis on s'estoit apperceu que leur intention estoit de les oster aux basteliers qui devoyent passer par là, afin que n'en trouvans pour tirer leurs basteaux, ils fussent par ce moyen retardez.