VI. FRAGMENTS AUCAS1N et NICOLETE

Nicolete fu en prison si que vous avés oï et entendu en le canbre. Li cris et le noise ala per tote le terre et par tôt le païs que Nicolete estoit perdue .... Aucasin traist au Vis-Conte de la vile , si l'apela. Sire Vis-Quens, c'avés vos fait de Nicolete ma très douce amie , le riens en tôt le mont que je plus amoie ? avés le me vos tolue ne enblée. Saciés bien que se je en muir, faide vous en sera demandée et ce sera bien drois , que vos m'arés ocis a vos deus mains : car vos m'avés tolu la riens. en cest mont que je plus amoie. Biaz Sire, fait li Quens, car laisciés ester. Nicolete est une caitive que j'amenai d'estrange terre. Si l'acatai de mon avoir à Sarasins. Si l'ai levée et bautisié et faite ma fillole. Si l'ai nourie, si li donasce un de ces jors un baceler qui del pain li gaegnast par honor; de ce n' avés -vos que faire; mais prendés le fille à un Roi ou à un Conte. En seur que tôt que cuideriés vous avoir gaegnié se vous l'aviés asegneurée ne mise à vo lit : moût i ariés peu conquis , car tos les jors du siècle en seroit vo arme en Infer , qu'en Paradis n'enterriés vos ja. En Paradis qu'ai-je à faire? je n'i quier entrer, mais que j'aie Nicolete ma très douce amie que j'aim tant.