CHAPITRE GXXXV
Comment messire Jehan de Luxembourg assiéga la ville de Guise; et comment la ville de Yverei La Gauchie fut rendue aux Anglois, par faulte de secours.
Messire Jehan de Luxembourg, capitaine de Picardie et gouverneur d'Arthois, se mist en paine de concquerre la conté de Guise qui luy ot esté donnée par le roy d'Angleterre et le régent de France ; et, par le congié du duc, assembla grant nombre de gens de guerre et eult en ladicte conté entrée, et y print pluiseurs forteresses; puis s'en alla, par l'ordonnance du duc, asségier puissamment la ville de Guise. Dont, quant ceulx de dedens sceurent sa venue, ilz ardirent leurs faubours et bien iiijc maisons ; et puis ilz mirent leurs murs à deffence, et en estoit capitaine Jehan, seigneur de Proisy; lesquelz envoyèrent signiffyer leur estât au duc de Bar, leur seigneur, et au duc de Lorraine, son beau père, pour avoir secours.
En ce mesme temps, fut Yvrey La Gauchie assiégie par les Anglois; devant laquelle fut prins jour de
rendre ou de combattre; et jour assiegné, à la veille de l'Assumpcion Nostre Dame, l'an mil iiijc xxiiij. Auquel jour, le régent comparut à compaignie des contes de Sallebry et de Sufforch, des seigneurs de Willevy et d'EstalIes ; et bien xviijc hommes d'armes et viijml archiers, bien habilliez et estoffez. Et si estoit, du party de Bourgoingne, le seigneur de Lille- Adam, et le seigneur de Moy, ausquelz le régent bailla, pour le jour, à porter la banière de France; et se, leur bailla cent chevaliers et escuiers, tant de l'ostel du duc comme d'aultres, pour les acompaignier. Le régent se tint en la place ordonnée, tout le jour jusques à l'endemain à xj heures, actendant illec ses ennemis qui estoient à trois lieues près de luy en nombre, comme l'en disoit, de xiiijm2 combatans. Desquelz estoit capitaine le duc d'Alenchon ; messire Jehan de Harcourt, conte d'Aumarle ; le viconte de Nerbonne ; le conte de Douglas et le conte de Boguehen, escochis, et moult d'aultres grans seigneurs, lesquelz n'aprochèrent point plus près pour combattre.
Ceulx d'Ivry, véans le jour passé de rendre ou combattre, se partirent à toutes leurs bagues, et rendirent la ville et chastel et tous leurs prisonniers, ainsi que traictié estoit. La reddicion faicte, le régent y mist ung vaillant chevalier de Galles, pour garder ladicte ville et chastel. Ce mesme jour de l'Assumption Nostre Dame, se party le régent pour trouver ses ennemis; lesquelz s'estoient partis et retrais en la
1. M. P. et Monstrelet. — xviijm est certainement une faute dans notre ms.
