NICOLAS LABBÉ

Aubigny^ vendredi i«' août.

A MON TRÈS HONNORÉ ET REDOUBLÉ SEIGNEUR MONS*' DE LA TRY- MOULLE, LIEUTENANT GENERAL DU ROY NOSTRE SEIGNEUR.

Mon très honnoré et redoubté seigneur, je me recommande humblement a vostre bonne grâce , en vous suppliant qu'il vous plaize sçavoir que j'ay tenu la frontière a Normandie avec beaucoup de compaignons de guerre ; et depuis que vous avez gaignyer la journée, je m'en suys allé courir en pays et suys arrivé a une plasse nommée Aubigny, là où ce souloient tenir des Bretons, en laquelle place je me suys bouté et les compaignons avec moy. Et depuis il est venu bien trante chevaulx de la compaignye de Meritain et avons fait entreprize d'aler a une place nommée Hedé , et tant par menasse que par autres moyens nous avons gecter lesditz Bretons hors, eulx cuidant que l'armée marchast ilec , et là ce sont mys lesditz gens de guerre dedans.

Et quant j'ay veu que nous estions dedans cestedicte place , je m'en suys sortys dehors et m'en suys aller en une autre place nommée Montmurant , en laquelle il y a environ soixante ou quatrevings Bretons dedans , lesquelz ce sont renduz a moy. Et pour ce , mon très honnoré seigneur, je vous supplie qu'il vous plaize moy rescripre ce c'est vostre plaisir que je tiengne ledit Aubigny et Montmurant , ou quelle choze j'ay affaire. Et actant, mon très honnoré seigneur, priant a Dieu qu'il vous doint bonne vie et longue.

Escript au chasteau d' Aubigny, ce premier jour d'aoust.

Vostre humble et obéissant serviteur ,

NYCOLLAS LABBÉ