Pldntin à Çayas

Monsieur Sayas. 22 juin 1568.

Le 12 du présent, j'escrivi et envoyé le catalogue des livres qu'à diverses fois j'ay envoyés au Signeur Leonardo de Tassis pour Vostre Révérendissime Signeurie, et adjouxtay ung des livres de Monsigneur le docteur Mena, auquel j'en désirerob envoyer quelque nombre, s'il luy plaisoit m'ordonner, comment je pourrois les envoyer à Sa Signeurie. Depuis j'ay accompagné Monsigneur le docteur Arias Montano à Louvain, où j'ay continué à congnoistre de plus en plus les singuliers [dons] de Dieu en Sa Signeurie. De sorte que je ne me sçay assés esmerveiller des rares vertus que j'aperçoy en tel personnage, chose qui le faict admirer et aimer d'un chaicun et me contrainct facilement à le recognoistre et tenir au mesmes rang et révérer comme de bon droict je fay et doibs faire Vostre Révérendissime Signeurie.

Pour le présent, je n'envoyé rien, craignant que le poste ne soit assés chargé, d'autant mesmes que le Signeur Hiéronyme Curiel m'a faict achapter du parchemin pour envoyer par la mesme poste. J'ay du papier fin de Francfort, duquel je délivreray tel nombre qu'il plaira à Vostre Révérendissime Signeurie le commander.