FRANÇOIS II, ROI DE FRANCE, AU PRINCE D'ORANGE

Il le requiert de se rendre à Reims, pour assister à son sacre, fixé au 17 septembre.

ViLLERS-COTTERÊTS, 3 SEPTEMBRE 1559.

Mon cousin, j'ay entendu, de mon oncle, le duc de Savoye, à son retour par deçà, que vous vous prépariez pour me venir trouver, quant je vous manderoys. Et, pour ce que j'ay résolu daller bientost me faire sacrer à Reins, et que je m'asseure que, environ le temps de mon sacre , toutes les restitutions qui se doivent faire de mon costé, auront esté achevées, il est

bien raisonnable , pour le contantement de la pluspart des Estatz de mon royaume, qui se trouveront à mondict sacre, et qui sçauront lesdictes restitutions effectuées de mon costé, qu'ilz vous veoyent là, et le conte d'Aiguemont, que j'ai mandé y a jà quelques jours. Sans ceste considération , je vous eusse voluntiers excusé de ceste peine, pour avoir la mesme seureté de la foy du roy des Espaignes , mon bon frère , que de la mienne propre, et n'avoir jamais doubté qu'il n'ayt si expressément commandé l'accomplissement de ce à quoy le traicté de paix l'oblige : que je tiens pour chose toute asseurée, que, ayant satisfait aux restitutions auxquelles je suys tenu, l'on ne fauldra ne différera de me rendre, au mesme instant, ce qui me doybt eslre restitué de son costé. Toutesfoys, ayant retardé le jour de mondict sacre jusqucs au xvij" de ce moys, pour ung peu d'indisposition que a eu la royne des Espaignes^ ma seur, dont, à ceste heure, la grâce à Dieu, elle est entièrement guérye, je me contanteray que vous vous rendez, le xv^ de cedict moys, audict lieu de Reims, qui est lieu si proche de vous. Et, avec cela, estans toutes noz restitutions effectuées respectivement en ce temps-là, vous aurez si peu d'occasion d'estre longuement absent de voz affaires et de vostre maison, que vous ne sçauriez, à mon adviz, avoir que bien fort agréable ce petit voyaige, auquel j'espère vous faire si bonne chère et telle démonstration de l'amityé que je vous porte, que vous ne vous en retournerez que fort satisfait et contant. Qui sera l'endroict, mon cousin, oîi je prierai Dieu qu'il vous ayt en sa saincte garde. Escript à Villiers-Coste-Retz, ce iij" jour de septembre 1559.