LXV. D'Amandes levées a tort

1. Li pledeeur souloient mètre en merci les simples homes, qui sanz le commandement a la justice s'agenolloient a fere leur seremenz, e quant il ooient que il estoient acusé de ce que il s'estoient agenollié, si se levoient e li pledeeur les acusoient derechief de ce que il s'estoient levé sanz le commandement a la jostice, e einssi les escrivôit li clers en merci. De ce dist Normanz d'Ogiervile que il avoit tant vescu que il veoit joer en la cort le roi a Bernart le Beccant, si comme li emfant joent e dient : « Or sus, Bernart », e se il ne se levast maintenant, il fust tainz de charbon en la face, autresi taignoit li clers en son parchemin les simples genz en merci.

2. Por eschiver tex acheisons commanda li senechaus qe li pledeeur, qui si deslealment jugeroient, fussent mis en la prison le roi tant que il eussent paié tout leur chatel jusqu'à la derreniere poitevine, e fussent d'ilec en avant tenu^ por desleaus entre leur voisins.