EPITAPHE D'UN PETIT CHIEN
iEssouBs ceste motte verte De lis et roses couverte Gist le petit Peloton, De qui le poil foleton Frisoit d'une toyson blanche Le doz, le ventre, et la hanche.
Son nez camard, ses gros yeux Qui n'estoient point chassieux, Sa longue oreille velue D'une soye crespelue, Sa queue au petit floquet Semblant un petit bouquet, Sa gembe gresle, et sa patte Plus mignarde qu'une chatte Avec ses petits chattons, Ses quatre petits tétons, Ses dentelettes d'ivoyre, Et la barbelette noyre De son musequin friand :
Bref tout son maintien riand Des pieds jusques à la teste.
Digne d'une telle beste, Meritoient qu'un chien si beau Eust un plus riche tumbeau.
Son exercice ordinaire Estoit de japper et braire, Courir en hault et en bas, Et faire cent mille esbas, Tous estranges et farouches, Et n'avoit guerre qu'aux mousches Qui luy faisoient maint tourment, Mais Peloton dextrement Leur rendoit bien la pareille :
Car se couchant sur l'oreille, Finement il aguignoit Quand quelqu'une le poingnoit :
Lors d'une habile soupplesse Happant la mouche traîtresse, La serroit bien fort dedans, Faisant accorder ses dents Au tintin de sa sonnette Comme un clavier d'espinette.
Peloton ne caressoit Sinon ceulx qu'il cognoissoit.
Et n'eust pas voulu repaistre D'austre main que de son maistre : Qu'il alloit tousjours suyvant, Quelquefois marchoit devant.
Faisant ne sçay quelle feste D'un gay branlement de teste.
Peloton tousjours veilloit Quand son maistre sommeilloit, Et ne souilloit point sa couche
Du ventre ny de la bouche, Car sans cesse il gratignoit Quand ce désir le poingnoit :
Tant fut la petite beste En toutes choses honneste.
Le plus grand mal, ce dict-on.
Que feist nostre Peloton, (Si mal appelle doit estre) C'estoit d'esveiller son maistre, Jappant quelquefois la nuict, Quand il sentoit quelque bruit.
Ou bien le voyant escrire, Sauter, pour le faire rire, Sur la table, et trépigner, Follastrer, et gratigner.
Et faire tumber sa plume.
Comme il avoit de coustume.
Mais quoy ? nature ne faict En ce monde rien parfaict.
Et n'y a chose si belle, Qui n'ait quelque vice en el'e.
Peloton ne mangeoit pas De la chair à son repas :
Ses viandes plus prisées C'estoient miettes brisées, Que celuy, qui le paissoit, De ses doigts amoUissoit :
Aussi sa bouche estoit pleine Tousjours d'une doulce haleine.
l8o DIVERS JEUX RUSTIQUES
Mon-dieu quel plaisir c'estoit, Quand Peloton se grattoit, Faisant tinter sa sonnette Avec sa teste folette !
Quel plaisir, quand Peloton Cheminoit sur un baston, Ou coifé d'un petit linge, Assis comme un petit singe, Se tenoit mignardelet D'un maintien damoiselet !
Ou sur les pieds de derrière.
Portant la pique guerrière Marchoit d'un front asseuré, Avec un pas mesuré !
Ou couché dessus l'eschine, Avec ne sçay quelle mine Il contrefaisoit le mort !
Ou quand il couroit si fort.
Qu'il tournoit comme une boule, Ou un peloton, qui roule !
Bref, le petit Peloton Sembloit un petit mouton :
Et ne feut onc créature De si bénigne nature.
Las, mais ce doulx passetemps Ne nous dura pas long temps :
Car la mort ayant envie Sur Tayse de nostre vie, Envoya devers Pluton
DIVERS JEUX RUSTIQUES l8l
Nostre petit Peloton,
Qui maintenant se pourmeine
Parmy ceste umbreuse plaine,
Dont nul ne revient vers nous.
Que mauldictes soyez-vous
Filandieres de la vie,
D'avoir ainsi par envie
Envoyé devers Pluton
Nostre petit Peloton :
Peloton qui estoit digne
D'estre au ciel un nouveau signe,
Tempérant le Chien cruel
D'un printemps perpétuel.
