COMME.NT PANTAGRUEL ARRIVA EN L'ISLE DE CASSADE

Delaissans l’isle des Ferremens, continuasmes nostre chemin ; le jour ensuivant entrasmes en l’isle de Cassade, vraye idée de Fontainebleau : car la terre y est si maigre que les os (ce sont rocs) luy percent la peau ; areneuse, stérile, mal saine et mal plaisante. Là nous monstra nostre pilot deux petits rocliers carrés à huit égales poinctes en cube, lesquels à l’apparence de leur blancheur me sembloient estre d’albastre, ou bien couverts de neige ; mais il nous les asceura estre d’osselets. En keux disoit estre à six estages le manoir de vingt diables de hazard tant redoutés en nos pays, desquels les plus grands bessons et accouplés il nommoit senes, les plus petits ambezas, les aultres moyens quittes, quadernes, ternes, double deux ; les aultres il nommoit six et cinq, six et quatre, six et trois, six et deux, six et as, cinq et quatre, cinq et trois, et ainsi consécutivement. Lors je notay que peu de joueurs sont par le monde qui ne soient invocateurs des diables : car jettans deux dez sus table, quand en dévotion ils s’escrient : « Senes, mon amy, » c’est le grand diable ; « Atnbezas, mon mignon, » c’est le petit diable; « Quatre et deux, mes enfans », et ainsi des aultres, ils invoquent les diables par leurs noms et surnoms. Et non seulement les invoquent, mais d’iceux se disent amis et familiers. Vray est que ces diables ne viennent tousjours à souhait sus l’instant ; mais en ce sont iis excusables. Ils estoient ailleurs selon la date