COMMENT ULRICH GALLET FUT ENVOYÉ DEVERS PICROCHOLE

Les lettres dictées et signées, Grandgousier ordonna que Ub-ich Gallet, maistre de ses requestes, homme saige et discret, duquel en divers et contentieux affaires il avoit esprouvé la vertu et bon advis, allast devers Picrochole pour luy remonstrer ce que par eux avoit esté décrété. En celle heure partit le bon homme Gallet, et, passé le gué, demanda au meusnier de l’estât de Picrochole : lequel luy fit response que ses gens ne luy avoient laissé uy coq ni geline, et qu’ilz s’estoient enserrés en la Roche Clermaud ; et qu’il ne luy conseilloit poinct de procéder oultre, de peur du guet : car leur fureur estoit enorme. Ce que facilement il creut, et pour celle nuyt hebergea avec le meusnier.

Au lendemain matin, se transporta avec la trompette à la porte du chasteau, et requist es gardes qu’ilz le fissent parler au roy, pour son profit.

Les paroles annoncées au roy, ne consentit aulcunement qu’on luy ouvrist la porte ; mais se transporta sus le boullevard, et dist à l’ambassadeur : « Qui a il de nouveau? Que voulez vous dire? » Adonc l’ambassadeur proposa comme s’ensuit :