CHAPITRE XV

faire instruire, enfin le prioit qu'il le voulsist retenir pour le moindre de ses serviteurs, car aultre don pour le présent ne requeroit des cieulx, sinon qu'il luy feust faict grâce de luy complaire en quelque service agréable. Le tout feut par icelluy proféré avecques gestes tant propres, pronunciation tant distincte, voix tant éloquente et languaige tant aorné et bien latin, que mieulx resembloit un Gracchus, un Ciceron ou un Emilius du temps passé qu'un jouvenceau de ce siècle.

Mais toute la contenence de Gargantua fut qu'il se print à plorer comme une vache et se cachoit le visaige de son bonnet, et ne fut possible de tirer de luy une parolle non plus q'un pet d'un asne mort.

Dont son père fut tant courroussé qu'il voulut occire Maistre Jobelin. Mais ledict Des Marays l'en guarda par belle remonstrance qu'il luy feist, en manière que fut son ire modérée. Puis commenda qu'il feust payé de ses guaiges et qu'on le feist bien chopiner sophisticquement ; ce faict, qu'il allast à tous les diables.

« Au moins (disoit il) pour le jourd'huy ne coustera il gueres à son houste, si d'aventure il mouroit ainsi, sou comme un Angloys ».

Maistre Jobelin party de la maison, consulta Grandgousier avecques le vice roy quel pre-

cepteur l'on luy pourroit bailler, et feut avisé entre eulx que à cest office seroit mis Ponocrates, pedaguoge de Eudemon, et que tous ensemble iroient à Paris, pour congnoistre quel estoit l'estude des jouvenceaulx de France pour icelluy temps.

Comment Gargantua fut envoyé à Paris, et de l'énorme jument que le porta et comment elle deffit les moustaches bovines de la Beauce.