CHAPITRE XVI

Ainsi joyeusement passèrent leur grand chemin, et tousjours grand chère, jusques au dessus de Orléans. Au quel lieu estoit une ample forest de la longueur de trente et cinq lieues, et de largeur dix et sept, ou environ. Icelle estoit horriblement fertile et copieuse en mousches bovines et freslons, de sorte que c'estoit une vraye briguanderye pour les pauvres jumens, asnes et chevaulx. Mais la jument de Gargantua vengea honnestement tous les oultrages en icelle perpétrées sur les bestes de son espèce par un tour duquel ne se doubtoientmie. Car, soubdain qu'ilz feurent entrez en la dicte forest et que les freslons luy eurent livré l'assault, elle desguaina sa queue et si bien s'escarmouschant les esmoucha qu'elle en abatit tout le boys. A tord, à travers, deçà, delà, par cy, par là, de long, de large, dessus, dessoubz, abatoit boys comme un fauscheur faict d'herbes, en sorte que depuis n'y eut ne boys ne freslons, mais feut tout le pays reduict en campaigne.

Quoy voyant, Gargantua y print plaisir bien grand sans aultrement s'en vanter, et dist à ses gens : « Je trouve beau ce », dont fut depuis appelle ce pays la Beauce. Mais tout leur desjeuner feut par baisler; en mémoire de quoy encores de présent les gentilzhommes de Beauce desjeunent de baisler, et s'en

trouvent fort bien, et n'en crachent que mieulx.

Finalement arrivèrent à Paris, auquel lieu se

refraischit deux ou troys jours, faisant

chère lye avecques ses gens, et s'en-

questant quelz gens sçavans

estoient pour lors en la

ville et quel vin on

y beuvoit.

Comment Gargantua paya sa bienvenue es Parisiens et comment il print les grosses cloches de l'église Nostre Dame.