CHAPITRE XX

Un desdictz maistres, nommé Maistrejousse Bandouille, luy remonstroit que ce n'estoit honeste ny décent son estât et qu'il le baillast à quelq'un d'entre eulx.

« Ha ! (dist Janotus) baudet, baudet, tu ne concluds poinct in modo et figura. Voylà de quoy servent les suppositions et parva logicalia. Panus pro quo supponit ?

— Confuse (dist Bandouille) et distributive.

— Je ne te demande pas (dist Janotus), baudet, quo modo supponit, mais pro quo ; c'est, baudet, pro tibils meis. Et pour ce le porterayje egomet, sicut suppositum portât adpositum. »

Ainsi l'emporta en tapinois, comme feist Patelin son drap.

Le bon feut quand le tousseux, glorieusement, en plein acte tenu chez les Mathurins, requist ses chausses et saulcisses ; car péremptoirement luy feurent déniez, par autant qu'il les avoit eu de Gargantua, selon les informations sur ce faictes. Il leurs remonstra que ce avoit esté de gratis et de sa libéralité, par laquelle ilz n'estoient mie absoubz de leurs promesses. Ce nonobstant, luy fut respondu qu'il se contentast de raison, et que aultre bribe n'en auroit.

« Raison (dit Janotus), nous n'en usons poinct céans. Traistres malheureux, vous ne valez rien ; la terre ne porte gens plus mes-

chans que vous estes, je le sçay bien. Ne clochez pas devant les boyteux : j'ai exercé la meschanceté avecques vous. Par la ratte Dieu ! je advertiray le Roy des énormes abus que sont forgez céans et par voz mains et menéez, et que je soye ladre s'il ne vous faict tous vifz brusler comme bougres, traistres, herectiques et séducteurs, ennemys de Dieu et de vertus ! »

A ces motz, prindrent articles contre luy ; luy, de l'aultre costé, les feist adjourner. Somme, le procès fut retenu par la Court, et y est encores. Les magistres, sur ce poinct, feirent veu de ne soy descroter, Maistre Janot, avecques ses adherens, feist veu de ne se mouscher, jusques à ce qu'en feust dict par arrest définitif.

Par ces veuz sont jusques à présent demourez et croteux et morveux, car la Court n'a encores bien grabelé toutes les pièces ; l'arrest sera donné es prochaines calendes Grecques, c'est à dire jamais, comme vous sçavez qu'ilz font plus que nature et contre leurs articles propres. Les articles de Paris chantent que Dieu seul peult faire choses infinies. Nature rien ne faict immortel, car elle mect fin et période à toutes choses par elle produictes : car omnia orta cadunt, etc. ; mais ces avalleurs de frimars font les procès davant eux pendens