CHAPITRE XXXV

Adoncq, se appoyant sus les poulces des deux mains à la crope davant soy, se renversa cul sus teste en l'air et se trouva entre les arsons en bon maintien; puis d'un sobresault leva tout le corps en l'air, et ainsi se tint piedz joinctz entre les arsons, et là tournoya plus de cent tours, les bras estenduz en croix, et crioit ce faisant à haulte voix: « J'enrage, diables, j'enrage, j'enrage ! Tenez moy, diables, tenez moy, tenez! »

Tandis qu'ainsi voltigeoit, les marroufles en grand esbahissement disoient l'ung à l'aultre: « Par la mer Dé! c'est un lutin ou un diable ainsi déguisé. Ab hoste maligno, libéra nos, Domine. » Et fuyoient à la route, regardans darriere soy comme un chien qui emporte un plumail.

Lors Gymnaste, voyant son advantaige, descend de cheval, desguaigne son espée et à grands coups chargea sus les plus huppés, et les ruoit à grands monceaulx, blessez, navrez et meurtriz, sans que nul luy resistast, pensans que cefeust un diable affamé, tant par les merveilleux voltigemens qu'il avoit faict que par les propos que luy avoit tenu Tripet en l'appellant pauvre diable ; sinon que Tripet en trahison luy voulut fendre la cervelle de son espée lansquenette; mais il estoit bien armé et de cestuy coup ne sentit que le chargement, et soub-

l80 GARGANTUA

dain se tournant, lancea un estoc volant audict Tripet, et, ce pendent que icelluy se couvroit en hault, luy tailla d'un coup l'estomac, le colon et la moytié du foye, dont tomba par terre, et, tombant, rendit plus de quatre potées de souppes, et l'ame meslée parmy les souppes. Ce faict, Gymnaste se retyre, considérant que les cas de hazart jamais ne fault poursuyvre jusques à leur période et qu'il convient à tous chevaliers reverentement traicter leur bonne fortune, sans la molester ny gehainer, et, monstant sus son cheval, luy donne des espérons, tyrant droict son chemin vers La Vauguyon, et Prelinguant avecques luy.

Comment Gargantua demollit le

chasteau du gué de Vede, et

comment ilz passèrent le gué.