CHAPITRE XXXVI

aux tours et forteresses, et luy tirèrent plus de neuf mille vingt et cinq coups de faulconneaux et arquebouzes, visans tous à sa teste, et si menu tiroient contre luy qu'il s'escria :

« Ponocrates, mon amy, ces mousches icy me aveuglent; baillez moy quelque rameau de ces saulles pour les chasser, » pensant des plombées et pierres d'artillerie que feussent mousches bovines.

Ponocrates l'advisa que n'estoient aultres mousches que les coups d'artillerye que l'on tiroit du chasteau. Alors chocquade son grand arbre contre le chasteau, et àgrans coups abastit et tours et forteresses, et ruyna tout par terre. Parce moyen feurent tousrompuzet mis en pièces ceulx qui estoient en icelluy.

De là partans, arrivèrent au pont du moulin et trouvèrent tout le gué couvert de corps mors en telle foulle qu'ilz avoient enguorgé le cours du moulin, et c'estoient ceulx qui estoient peritz au déluge urinai de la jument. Là feurent en pensement comment ilz pourroient passer, veu l'empeschement de ces cadavres. Mais Gymnaste dist :

« Si les diables y ont passé, je y passeray fort bien.

— Les diables (dist Eudemon) y ont passé pour en emporter les âmes damnées.

— Sainct Treignan ! (dist Ponocrates) par

doncques conséquence nécessaire il y passera.

— Voyre, voyre (dist Gymnaste), ou je demoureray en chemin. »

Et donnant des espérons à son cheval, passa franchement oultre, sans que jamais son cheval eust fraieur des corps mors; car il l'avoit acoustumé (selon la doctrine de ^Elian) à ne craindre les âmes ny corps mors — non en tuant les gens comme Diomedes tuoyt les Traces et Ulysses mettoit le corps de ses ennemys es pieds de ses chevaulx, ainsi que raconte Homère, — mais en luy mettant un phantosme parmy son foin et le faisant ordinairement passer sus icelluy quand il luy bailloit son avoyne.

Les troys aultres le suyvirent sans faillir, excepté Eudemon, duquel le cheval enfoncea le pied droict jusques au genoil dedans la pance d'un gros et gras villain qui estoit là noyé, à l'envers, et ne le povoit tirer hors ; ainsi demoureroit empestré jusques à ce que Gargantua du bout de son baston enfondra le reste des tripes du villain en l'eau, ce pendent

que le cheval levoit le pied, et (qui est

chose merveilleuse en hippiatrie) feut

ledict cheval guery d'un surot

qu'il avoit en celluy pied

par l'atouchement des

boyaux de ce gros

marroufle.

Comment Gargantua, soy peignant,

faisoit tomber de ses cheveulx

les boulletz dartillerye.