XL. — M"° DE BOURDEILLE A MALVYN

[nd Crée) Archives municipales de Bordeaux, ms. Delpit, f® 212 r°-213 V° copie.

Monsieur,

Je prens asseurance que, comme bon chrestien que vous estes et curieus de vostre salut, le temps n’aura point l’honeur de parfaire ce que vostre genereuse ame peut de soi accomplir, et sans contester davantage se formera à ce qu'il plait aus ordonnances divines nous prescrire de bon et de mauvais. Vostre douleur est juste, Monsieur, d’avoir perdu ceste sage et vertueuse fille unique, de lui fournir des regretz. Mais quoi ? Monsieur, elle tire son gain de vostre perte, son bonheur de vos infortunes et ses felicités de vos peines. Chose estrange que ces contrarietés du ciel et de laterre, quand nous separons des secondz nous mesmes, que ce que nous aimons tant en ce monde et qui de leur costé nous cherissoit aussi, acompagnés de mesmes affections et volontés, qu’ilz ne ressentent point nos maus ni nous leurs biens; et parmi leurs prosperités ne possedons que tristesses et eux dans nos propres douleurs que repos. Il se faut resoudre en ceste action icy, Monsieur, et faire valoir ses beles qualités dont vous estes orné et enrichi au delà du commun, prendre avantage sur le mal qui vous presse et conserver vostre santé qui est si utile à tous ceux qui honorent vostre merite, et particulierement pour une honeste femme, frappée de pareil orage de malheur que vous, etun petit regetton qui jette sa veue sur vostre bonté. Il heritera possible un jour aussi bien à vos vertus que moiens et commodités. Ne les abandonnés pas, Monsieur. Que si les prières et oraisons de tous ceus qui ont de laffection pour vostre soulagement ont de la force à l’endroit de ceste Deité saincte, il n'ia nul qui ne dresse ses vœus et offrandes. Les mienes y sont ordinaires puis avoir sceu telles subversions arivées dans vostre maison, que je resens

avecques toutes sortes de passions et vos afflictions et celles de madamoiselle de Cessac comme les mienes propres. Je le jure du meilleur de mon cœur qu'ilz me sont aussi sensibles que si je croiois ma presance estre necessaire à vostre bien et repos, je ferois l’office de mes lettres, tant mes affections sont entières à la recognoissance de celles dont m’avés tousjours honorée et l’un et l’autre, qui vous a donné toute puissance absolue de me commander tous deus. J’ai prié le sieur de la Mothe vous aler treuver tous deus de ma part, en quelque lieu que soyés, pour me raporter l’estat de vos santés au plus tost, ne pouvant patienter davantage, et sçavoir en quoi je pourrois rendre des preuves valables en se trouble icy combien je suis veritablement, Monsieur, vostre très humble et affectionnée obeissante cousine à vous faire service.