IV, — REMONTRANCE AU PARLEMENT RELATIVE À L'AFFAIRE DE PICHON

(23 novembre 1594.)

Archives municipales de Bordeaux, ms. Delpit, f° 61 r°-68 r° (copie revue par l’auteur).

.… Qu'il avoit esté loysible de tout temps aulx presidentz et conseilliers de la Cour, quand il s’agissoit de l'honneur de Dieu, du service du roy, de la dignité de la compagnie, du bien de la justice, de l’ordre et police d’icelle et aultres reglementz ou debvoirs concernantz la bien sceance de ladite Cour, de proposer et representer en icelle ce qu'ilz jugeoent y debvoir estre rapporté. Ceste louable coustume semble avoir esté puysée des meurs des compagnies souveraines greques et romaines et traduite despuis ès parlementz de ce royaume. L’utilité y est si apparente et si formée en telz exemples qu’ilz semblent plus que nulz autres debvoir estre continués pour les bons et vertueus enseignementz qui en reuscissent et pour la perpetuelle discipline des parlementz.

Et si à nulz telles propositions et remonstrances convienent, elles apartiennent sur tous à ceus qui ont vescu longuement et avec honeur en l’exercice et administration de leurs charges. L’eage et leur merite sont de pièces et des tiltres bien qualifiés pour recevoir avec plus d’authorité les raisons et advertissementz qu’ilz proposent. Le dit de Malvyn ne peut alleguer son merite, mais bien veut il dire qu’il ne peut et ne doit ceder à nul en l'affection qu’il a de servir au roy et à la Cour, et d’y verser avec toute la droiture et integrité qu’il luy sera possible. Quant à l'eage, il a vingt et six ans qu’il exerce continuellement sa charge et s’en est tousjours aquité, comme il croit, au contentement de la Cour. D'ailleurs, il semble que tant luy que tous aultres de ce corps ont esté invités, par l’arrest du dix huitiesme de ce mois, à dire et proposer en cest affaire, sur le rang et presseance du sieur de Pichon, tout ce qu’ilz estimérent y debvoir estre recerché et consideré. Ledit de Malvyn declaire que ce qu'il en remonstre à la cour n’est pour hayne, rancune ny inimitié quelconque qu’il ayt contre ledit de Pichont. Et desire que ledit Pichon soit persuadé ? qu’il n'est poussé d’aulcun maltalent contre luy, et partant que tout ce qu'il dira il le pretend dire sans contumelie et sans injure dudit

1. 1° réd. : contre ledit de Pichon non plus qu’il n'en a point contre ses propres ayeuls et bisayeulx qu’il n’a jamais veus ni cogneus. Mots biffés par Malvyn, qui a récrit de sa main : contre ledit de Pichon.

2. 1° réd.: Ef prie bien fort ledit sieur de Pichon de se vouloir persuader.