DE PAR LE REGENT DAUPHIN

Chiers et bien amez, pour ce que bien savons qu'’estes en continuel desir de savoir au vray de noz nouvelles et affaires de pardeça, et que bonne resistence et provision soit mise aux emprises des Anglois noz anciens ennemis, vous faisons savoir que, puis aucuns jours en ça, beaux cousins le conte de Boucquen, connestable de France, Richart de Bretaigne ?, et nos autres chiefz et gens, qui de present sont en très grant nombre et puissance, ont esté par deux jours entiers sur les champs à v ou vi lieues seulement desdiz ennemis, en les attendant, tous prestz et disposez, se venuz feussent, de les combatre; mais iceulx ennemis ont prins autre chemin, et se sont tirez vers Baugency et Meung-sur-Loire; et pour ce nos dictes gens vont après, en faisant leur poursuite, et les ont jà fort approuchez. Par quoy, à l'aide de Nostre Seigneur, avons esperance d'en oir en brief bonnes nouvelles, et que nos dictes gens se y gouverneront si prudemment et si vaillamment que ce sera à leur honneur et à nostre prouffit. Et si tost que aucune chose de bien y survendra, nous la vous signifierons. Si vueillez tousjours soigneusem®ent entendre au bon gouvernement de la ville et eité de Lyon, ainsi qu’en avons en vous singulière-