CHARLES, PAR LA GRACE DE DIEU, ROY DE FRANCE

Hault et puissant très chier cousin, nous avons receu les lectres que, par maistre Guillaume Cousinot et Pierre de Fontenil, nos conseillers et ambaxeurs, escriptes nous avez, et aussi celles que maistre Jehan Lenfant et Jehan Hanneford, chevalier, consiliers de nostre beau nepveu d'Angleterre, et vos ambaxeurs, nous ont presentées de par vous, ensemble oy ce que par iceulx vos ambaxeurs nous a esté dit et exposé de vostre part. Ausquelles choses leur avons fait responce que tousjours vouldrions tout debvoir estre fait de nostre part, ne, comme povez avoir congneu, n'est aucun inconvenient en nostre deffault advenu ou fait des treves. Mais, besongner presentement ez autres attemptaz et laissier le fait de Fougières derrière, qui est si grant et si enorme, et si directement contre la teneur desdictes treves, est chose bien clere que ce seroit petitement pourveoir à l’entretenement d'icelles. Vous congnoissez le cas tel qu'il est, et les inconveniens qui, par faulte de reparacion, en puent ensuivir. Vous estes celui qui avez la charge et lieutenance general de par nostre beau nepveu d'Angleterre decça la mer, et à qui on doit avoir recours, et estes tenu de donner provision quant tels cas adviennent. Et ainsi nous a-t-il esté fait scavoir, de bouche et par escript, par deux fois, par nostre dit nepveu. Vous scavez ce que la treve porte et congnoissiez ce qui est à faire par raison touchant ladicte matiere. Vosdiz ambaxeurs nous ont dit que vous aviez entier vouloir et bon au bien de paix et à l’entretenement desdictes treves. Nostre intencion est de envoier bref aucuns des gens de nostre Conseil à Louviers ou à Evreux; ils verront quel debvoir et quelle reparacion auront esté fais par effet touchant ladicte matiere, et, fait de vostre part ce qu'il appartient, de la nostre sera tellement fait, au plaisir de Dieu, que chascun pourra

congnoistre que nous avons entier et bon vouloir au bien de la paix et à l’entretenement desdictes treves.

Donné à Razillé, le xir1° jour de may.

CHARLES 1

Le Roi au roi d'Angleterre Razilly, 3 juin 1449.

À très hault et puissant prince nostre très chier nepveu d’Angleterre, Charles, par la grâce de Dieu, Roy de France, inclinacion d'amour, avec cordial desir à toute vraye paix et parfaite union.

Très hault et puissant prince, nostre très chier nepveu, pour ce que souventes fois nous avés fait savoir que oir de nos nouvelles vous est chose bien agreable, ainsi que du semblable estre de vous acertené en bien nous est grant lyesse et consolacion, se vostre plaisir estoit d’en savoir, nous estions, à la facon de cestes, en bon eslat et disposicion, graces à Nostre Seigneur, qui pareillement vous vueille tout temps maintenir, comme de bon cuer le desirons et que pour nostre propre personne mieulx le saurions demander ou requerir. Tres hault et puissant prince nostre très chier nepveu, par ce que derrenierement vous avons escript par Edouart Gymeston, escuier, vostre serviteur et familier domestique, vous avez peu voir la responce que lui avons faicte aux troys poins dont il nous avoit parlé de par vous. Et, pour ce que chascun jour seurviennent nouvelles choses, et que puet estre on vous donne ou pourroit donner à entendre autrement que la verité, nous envoyons presentement par devers vous nostre amé et feal varlet tranchant Jehan Havart, porteur de cestes, pour vous dire et exposer bien au long toutle demené des matières; car croyez que nous avons tousjours eu bon vouloir au bien de paix et eussions esté bien joyeux que tous bons et convenables moyens y eussent esté trouvez, ne à nous n’a tenu ne ne tiendra. Si vous prions que ledit Havart vous plaise benignement oir et adjouster pleine foy à tout ce qu'il vous dira de : nostre part, pour ceste foiz, touchant les choses dessus dictes, et par luy nous signifier s’il est chose à vous agreable que convenable-

1. Copies modernes. Du Puy, 760,.f. 153, et ms. fr. 13954, f. 3 ; édité par D. Morice, t. 11, col. 1456.

ment faire puissions, pour nous y emploier de très bon cuer, au plaisir de Nostre Seigneur, lequel nous prions, très hault et puissant prince nostre très chier nepveu, que tousdis vous vueille avoir et tenir en sa saincte et benoiste garde.

Donné à Rasilly, le 1 jour de juing!. d

Le Roi à la reine d'Angleterre

Razilly, 3 juin 1449.

A très haulte et puissante princesse nostre tres chière niepce d'Angleterre, Charles, etc., salut et entiere dilection. ‘ Très haulte et puissante princesse nostre très chiere niepce, pour ce que pensons que estre acertenée de noz nouvelles en bien est chose que bien vous vient à plaisir, ainsi que de vous oir le semblable nous est singuliere resjoissance, se vostre plaisir estoit d'en savoir, à la rescription des presentes nous estions en bon estat et disposicion, graces au benoist filz de Dieu, qui le pareil tout temps vous vueille octroyer, ainsi que parfaitement le desirons et que pour nous mesmes mieulx le saurions souhaitier. Au seurplus, très haulte et puissante princesse nostre lrès chière niepce, nous envoyons presentement par devers très hault et puissant prince nostre beau nepveu, vostre espoux, nostre amé et feal varlet tranchant Jehan Havart, pour luy dire et remonstrer aucunes choses touchant l’estat et le demené des matieres de par deça, lequel Havart avons chargé vous aler faire la reverence et nous raporter au vray du bon estat, santé et prosperité de vostre très noble personne, que Dieu, par sa saincte grace, vueille tousjours conduire et entretenir de bien en mieulx. Si vous prions que, par icelui Havart, nous en vueillez faire savoir, ensemble s’il est chose à vous agreable que convenablement faire puissions, pour nous y employer de très bon cuer, au plaisir de Nostre Seigneur, lequel nous prions, très haulte et puissante princesse nostre très chière niepce, qu’il vous ait et tiegne en sa saincte et benoïste garde.

Donné à Raisilly, le r1r° jour de juing?.

4, Minute sur papier. Chartes royales, XV, n° 209. 2. Minute.sur papier. Chartes royales, XV, n° 208.