GIRARD

Receues le XXVIIT* dudit mois.

° Le Roi à ses gens des comptes

Saint-Priest, 29 avril 1457.

DE PAR LE ROY

Noz amez et feaulx, nous avons receu voz lettres du vx jour de ce mois, responsives à celles que paravant vous avions escriptes, par lesquelles vous mandions que, appellez avec vous noz advocaz et procureur en nostre Court de Parlement, esleussiez trois personnes suffisans et ydoines pour tenir et excercer l'office de president de nostre chambre des comptes que souloit tenir feu le patriarche d’Anthioche, et avons veu l'esleccion que nous avez envoyée de deux prelaz d’eglise et d'un lay, pour en choisir l’un tel qu’il nous plairoit pour tenir ledit office; aussi avons veu la diligence que avez faicte de sercher les anciens registres et papiers de nostre chambre des comptes sur ceste matière, dont et de la diligence que sur ce avez faite avons esté et sommes bien contens. Et, pour ce que, en la fin de vosdictes lettres, nous escripvez que, se vous eussions mandé que nous eussiez envoyé voz adviz pour savoir lequel est plus expedient et proufitable pour nous mectre audit office de president homme clerc ou lay, vous en feussiez acquictez, et que sur ce desirons bien savoir qu’il vous en semble, nous voulons et vous mandons que, appelez de rechief avec vous nozdiz advocaz et procureur, advisez ensemble lequel sera plus convenable et proufitable pour nous de y mectre et ordonner president homme