EN LA BASSE PARTIE DE LA VILLE , DEÇA LES PONS
Les églises parochiales de Saint-Jaques-de-la-Boucherie, de Saint- Eustace, de Saint-Germain-d'Aucerre, des Innocens, de Saint-Marry, de Saint-Sauveur, de Saint- Honnoré, où est Nostre-Dame-de-Vertus; de Saint- Pol, de Saint-Gervais, de Saint-Jehan , de Saint-Nicholas-lez- Saint-Martin, de Saint-Josse, de Saint-Giiie et de Saint-Julien.
L'abbaye de Saint-Magloire , dont l'abbé a juridiction temporele ; les priorés de Saint-Martin, de la Trinité et du Temple, qui est aux hospitaliers. L'ostel des quinze vingts Aveugles. Les Béghines , les Bons-Enfants ; la chapelle des bonnes femmes Haudry ; les églises de Saint-Bon , de Sainle-Avoye, de Saint-Éloy, des religieuses appellées les Filles-Dieu.
Les collèges de Louvres, de Sainte-Oportune, du Saint-Sépulchre, de la Trinité, des Vilkccettes ? de Sainte-Croix, des Guillemins, de Sainte- Kateline, des Célestins, de Saint-Anthoine-le-Petit, du Saint-Esprit et de Saint-Jaques surnommé de l'Ospital, que Charlemaine fonda, et autres. A Saint-Anthoine est ung ostel de bois entailliée xcellemment. A Sainte- Kateline est le sépulcre Nostre-Seigneur en telc forme comme il est en Jherusalem ; et si est en celle église l'image de Bertram Clakin , tele comme il souloit estre en son vivant.
Aux Célestins est paradis et enfer en painture , avec autres pourtraturcs de noble euvre en ung cuer à part. Item devant le cuer de l'église a ung autel où est painte une y mage de Nostre-Dame de souveraine maistrise.
A l'église des Innocens est ung innocent entier enchâssé d'or et d'argent; là sont engigneusement entaillies de pierre les ymages des trois vifz et (des) trois mors; là est ung cimitière moult grant, enclos de maisons appelles charniers, là où les os des mors sont entassés, lllcc sont paintures notables de la dance macabre et autres, avec escriptures pour esmouvoir les gens à dévotion. L'une partie du cimitière appartient à l'église des Innocens , l'autre partie est pour le grant hospital , et la tierce partie est pour les églises de Paris qui n'ont point de cimetière. Item est une tournelle en lieu d'un tombe! , où il a une image de Nostre-Dame entaillée de pierre, moult bien faicte ; laquele tournelle l'en dist que ung homme fist faire sur sa sépulture pour ce qu'il s'estoit vanté en son vivant que les chiens ne pisseroient point sur son sépulcre.
La tour et le chas tel du Louvre où il y a logis pour le Roy et les douze pers. Item la Bastille Saint-Anthoine, qui est moult forte. Item l'ostel de Bourbon, qui est de moult riche et plaisant ouvrage. Les hostelz de Saint-Pol , où le Roi et la Royne demouroient ; de Petit-Muche , où le Daulphin demouroit ; l'ostei de Cecille , appartenais au roy de Jherusalem et de Cecille; l'ostel de Tournelles , au duc d'Orléans; l'ostel l'Artois, au duc de Bourgogne; l'ostel du Roy de Navarre; l'ostel de Flandres, que le duc Jehan de Bourgoingne donna au duc Anthoine de Brabant ; les hostelz d'Alenchon , de Hollande , de Montagu, de Tournay, de Clichon et plusieurs autres. Le Chastellet, où le prevost de Paris et ses auditeurs tiennent les plais ; et là sont les prisons en merveilleux nombre. L'ostel de la ville en la place de Grève, où le prevost des marchans et les eschevins font loy. L'ostel appelé le Four-Levesque où l'en plaide des causes du temporel de la juridiction de l'evesque de Paris; c'est en la rue de l'Escole-Saint-Germain. Les halles des draps, de peleterie, de mercerie, de cuirs, de pain, de fruit et d'autres choses, contenais l'espace d'une ville de grandeur.
Aux halles , lèz le pillory, est une fontaine , en la rue Saint-Denis,
deux, et en la rue Saint-Martin, deux. En Grève est l'estaple des vins, du bois, de charbons, de foing et autres marchandises en nefz ; là sont les porteurs d'afeutrures et boteleurs de foing. Le bel hostel de Bureau Dampmartin en la Courarie, lequel Bureau, entre les autres choses de son estât, tenoit ung poète de grant auctorité, appelle maistre Lorens de Premierfait ; l'ostel de Digne Responde, en la vieille Monnoie, et antres plusieurs.
l'hostel de maistre jaques duchié, en la rue des prouvellës.
La porte du quel est entaillie de art merveilleux ; en la court estoient paons et divers oyseaux à plaisance. La première salle est embellie de divers tableaux et escriptures d'enseignemens , atachiés et pendus aux parois. Une autre salle remplie de toutes manières d'instruments, harpes, orgues, vielles, gui ternes, psalterions et autres, des quelz le dit maistre Jaques savoit jouer de tous. Une autre salle estoit garnie de jeux d'eschez, de tables, et d'autres diverses manières de jeux, à grand nombre. Item une belle chappelle où il avoit des pulpitres à mettre livre dessus , de merveilleux art, lesquels on faisoit venir à divers sièges loings et près, à destre et à senestre. Item ung estude où les parois estoient couvers de pières précieuses et d'espices de souefve oudeur. Item une chambre où estoient foureures de pluseurs manières. Item pluseurs autres chambres richement adoubez de lits , de tables engigneusement entaillies, et parés de riches draps et tapis à orfrais. Item en une autre chambre haulte estoient grant nombre d'arbalestes, dont les aucuns estoient pains à belles figures. Là estoient estendars, banières, pennons, arcs à main, picques, faussais, planchons, haches, guisarmes, mailles de fer et plont , pavais, targes , escus, canons et autres engins, avec plenté d'armeures; et briefment il y avoit aussi comme toutes manières d'appareils de guerre. Item là estoit une fenestre faite de merveillable artifice , par laquele on mettoit hors une teste de plates de fer creuse , par my laquele on regardoit et parloit à ceulx de dehors , se besoing estoit , sans doubter le trait. Item par dessus tout l'ostel estoit une chambre carrée, où estoient fenestres de tous costés pour regarder par dessus la ville. Et quant on y mangeoit, on montoit et avaloit vins et viandes à une polie, pour ce que trop hault eust esté à porter. Et par dessus les pignaclcs de l'ostel estoient belles ymages dorées. Cestui maistre Jaques Duchié estoit bel homme, de honneste habit et moult notable ; si tenoit serviteurs bien moriginés et instruis , d'avenant contenance , entre lesquels estoit l'un maistre charpentier, qui continuelment ouvroit à l'ostel. Grant foison de riches bourgeois avoit et d'officiers que on appeloit petis royeteaux de grandeur.
L'ostel de Guillemin Sanguin, en la rue Bourdonnois, d'excellent édi-
5r4 APPENDICE.
lice, où il a de séreures autant comme il a de jours en l'an. Les hostelz des évesques et prélas en grant quantité, des seigneurs de parlement* des seigneurs de la chambre des comptes , des chevaliers, bourgeois et divers officiers. Entre lesquels estoit l'ostel de sire Mille Baillet, en la Voirrie, qui estoit trésorier du roy; ou quel hostel estoit une chappelle où l'en célébroit chascun jour l'office divin. Il y avoit salles , chambres et estudes en bas pour demourcr en esté par terre , et en hault tout pareillement où l'en habitoit en y ver; si y avoit des voirières autant qu'il a de jours en l'an. Avec ce le dit sire Mille avoit hors Paris , de trois costez de la ville où ses héritages estoient , si grans hostelz à haulte court et basse que ung grant prince se y logeoit bien. Aussi pluseurs autres avoient des beaulx hostelz dehors.
Entour Chastelet vendoit-on sel, fruit et herbes , et aussi y faisoit-on tout l'an chappeaux de diverses fleurs et verdeurs ; et devant Chastelet estoit la grant boucherie. Devant l'ostel de l'amiral, lez Saint Jehan, estoit une diverse grosse pierre de merveilleuse façon, que l'en nomme le Pet-au-Diable. Et à la porte Baudet vendoit-on moult de vivres.
