DES PORTES DE LA BASSE PARTIE DE LA VILLE
La porte Saint-Anthoine : au dehors près d'icelle est une abbaye de nonnains appellée de Saint-Anthoine; après est la Grandie aux Marchiers; après l'ostel de Conflans ; item le Séjour du Roy ; item le pont de Charenton , où il a deux grosses tours , oultre lequel est l'église Nostre- Dame-de-Mets. Et d'autre part l'abbaye de Saint-Mor-des-Fossez, esquel deux lieux l'en fait moult de pèlerinages. Item, aune lieue et demie, près de la dicte porte, est le bois de Vincennes , lequel est enclos de moult haulx murs; et est plus grant que la ville de Paris. Il y a ung chastel à onze grosses tours, haulx comme clochiers , où il a une chanonie et logis pour le Roy. En ce bois est une église d'une manière de hermites appelles Bons-Hommes; item d'un costé est ung bel hostel appelle Beauté. En ce bois ont acoustumé à estre toutes manières de bestes sauvages. La porte du Temple, où sont grans jardins. La porte Saint- Martin : là sont forbourcs où est l'église paroschiale de Saint-Lorens ; à une lieue est Longhe ville , et à trois lieues estBourget, et tout une chaucée. La porte Saint-Denis : là sont forbours où est l'église Saint-Ladre ; à une lieue est l'église appellée la Chappelle. Item à deux lieues est l'abbaïe de Saint-Denis, la quele est d'excellent édifice: là sont les corps de saint Denis et ses compaignons, saint Ruth et saint
Éleuthère, en grans riches fiertés ; si y est une maisoncelle dessus appelle tegurion, toute d'argent, à riches pierres, laquele fist saint Éloi. Si fu au premier la couverture de l'église d'argent, mais puis pour une grant guerre fu descouverte, et fu pour ce baillié à l'église ung des sains cloux, une partie de la sainte couronne , une partie de la lance , une partie de la sainte croix, le suaire Nostre-Seigneur, le destre bras saint Siméon, une chemise de Nostre Dame et autres notables reliques. Illec sont moult de riches sépultures de roys et princes ; là prent le roy l'oriflambe quant il va en guerre : c'est ung gonfanon dont la hante est dorée et la banière vermeille à cinq frenges , où l'en met houpes de vert. Entre Paris et Saint-Denis est la place du Lendit ; et sur la rue sont pluseurs grans et notables croix entaillies de pierres, à grans ymages ; et sont sur le chemin en manière de monjoies pour adrechier la voie. La porte de Montmartre ; à demie lieue près est le mont où l'en prent la piastre dont l'en fait les maisons à Paris ; sur lequel mont est une abbaye de nonnains. Item, au pié du mont, est l'église appellée des Martirs, que sainte Geneviève fonda, où saint Denis et ses compaignons furent décolez. La porte Saint-Honnoré ; là sont forbours où est l'église appellée au Rolle. Item à deux lieues est l'église Nostre-Dame-de-Bouloigne la petite, où l'en fait moult de pèlerinages ; illec près est le pont Saint-Clou, où a deux fortes tours.
LA QUINTE PARTIE, EN LAQUELE EST DEVISÉ EN GÉNÉRAL DE L'EXCELLENCE DE LA VILLE.
L'en souloit estimer à Paris plus de quatre mil tavernes de vin, plus de quatre-vingt mil mendians, plus de soixante mil escripvains; item de escoliers et gens de mestier sans nombre ; item la compaignie, prélas et princes à Paris , assiduelment conversans, les noblesces, les estas , les richesces et diverses merveilles, solennitez et nouvelletez ne pourroit nulz raconter parfaitement. L'en estimoit l'or, l'argent et pierreries estans aux reliques et vaissellement des églises de Paris , valoir ung grant royaume. On mengeoit à Paris chascune sepmaine, l'une parmy l'autre comptée , quatre mille moutons, deux cens quarante bœufs , cinq cens veaux, deux cens pourceaux salés et quatre cens pourceaux non salés. Item on y vendoit chascun jour sept cens tonneaux de vin , dont le Roy avoit son quatrième, sans le vin des escoliers et autres qui n'en paioient point, comme les seigneurs et autres pluseurs qui le avoient sur leurs héritages.
Grant chose estoit de Paris quant maistre Eustace de Pavilly, maistre Jehan Jarçon , frère Jaques Legrant, le menistre des Mathurins et autres docteurs et clercs soloient preschier tant d'excellens sermons , et du beau service divin qu'on y célébroit alors. Item quant les roys de France, de Navarre et de Cécille , plusieurs ducs , contes , prélas et autres seigneurs notables fréquentoient illec assiduelment. Item quant y demou-
roient inaistrc Gille des Champs, souverain docteur en théologie; maistre Henry de Fontaines, astrologien ; l'abbé du Mont-Saint-Michel, docteur en droit canon; l'évesque du Puy, en droit civil; maistre Thomas de Saint-Pierre, en médecine; maistre Gille-Soubz-le-Four, encirurgie, et pluseurs excellens clers de plaisant réthorique et éloquence.
Item quant y conversoient maistre Lorens de Premierfait, le poète ; le théologien Alemant, qui jouoit sur la vielle; Guillemin Dancel et Perrin de Sens, souverains harpeurs ; Cresceques, joueur à la rebec; Chynenudy, le bon corneur à la turelurette et aux fleutes; Bacon, qui jouoit chançons sur la siphonie et tragédies. Item Gober t , le souverain escripvain, qui composa l'Art d'escripre et de tailler plumes; et ses disciples, qui par leur bien escripre furent retenus des princes, comme le juenne Flarael du duc de Berry, Sicart du roy Richart d'Engleterre, Guillemin du granl-maistre de Rodes, Crespy du duc d'Orléans , Perrin de l'empereur Sigemundus de Romme; et autres pluseurs.
Item pluseurs artificieux ouvriers, comme Herman , qui polissoieut dyamans de diverses formes ; Willelmus l'orfèvre ; Andry, qui ouvroit de laiton et de cuivre doré et argenté ; le potier qui tenoit les rossignol/, chantans en y ver ; les trois frères enlumineurs et autres d'engigneux mestiers. Item Flamel l'aisné, escripvain qui faisoit tant d'aumosnes et hospitalité/ ; et fist pluseurs maisons où gens de mestiers demouroient en bas, et du loyer qu'ilz paioient estoient soutenus povres laboureurs en liault. Item la belle saunière, la belle bouchière, la belle charpentière et autres dames et damoiselles ; la belle herbière et celle que on clamoit la plus belle, et celle qu'on appeloit belle simplement. Item damoiselle Christine de Pizan , qui clietoit toutes manières de doctrines et divers traités eu latin et en françois. Item le prince d'amours, qui tenoit avec lui musiciens et galans, qui toutes manières de chançons, balades, rondeaux, virelais et autres dictiés amoureux sa voient faire et chanter, et jouer en instrumens mélodieusement.
Lougue et grant chose scroit de raconter des biens que en y voit, mesmement quant si pou de chose comme estoit l'imposicion des chappeaux de roses et du cresson valoit au roy dix mil frans l'an. Ils souloient venir solacier à Paris l'empereur de Grèce , l'empereur de Romme, et autres roys et princes de diverses parties du monde. Item au couronnement de la Royne de France , Ysabel de Bavière, quant elle vint premièrement à Paris, si y vindrent avec elle plus de cent vingt mil personnes à cheval, que la Royne paya. Item, l'an mil quatre cent dix-huit, en une mortalité, morurent en POstel-Dieu, lez Notre-Dame, plus de trente mil personnes, comme il apparut en la chambre des comptes, où l'en livre les draps pour ensevelir.
FrN DU SECOND VOLUME.
