LXXX. TRIBULATIONS DE JOINVILLE A ACRE

406. Ci après orrez de plusours persecucions et tribulacions que j'oy en Acre, desquiez Diex, à cui je m'atendoie et à cui je m'atent, me délivra. Et ces choses ferai-je escrire, pour ce que cil qui les orront aient fiance en Dieu en lour persecucions et tribulacions ; et Diex lour aidera aussi comme il ftst moy.

407. Or disons donc que quant li roys vint en Acre, toutes les processions d'Acre li vindrent à {'encontre recevoir jusques à la mer, à moût grant joie. L'on me amena un palefroi. Si tost comme je lu montez sus, li cuers me failli ; et je dis à celi qui le palefroy m'avoit amenei, que il me tenist que je ne cheisse. A grant peinne me monta l'on les degrez de la sale le roy. Je me assis à une fenestre, et uns enfes delez moi (et avoit entour dix ans de aage), qui avoit à non Berthelemin, et estoit fiz bertars à mon signour Ami de Monbeliart signour de Monfaucon^

408. Endementres que je seoie illec, là où nus ne se prenoit garde de moy, là me vint uns valiez en une cote vermeille à dous roies jaunes, et me salua, et me demanda se je le cognoissoie ; et je li dis nanin. Et il me dist que il estoit d'Oiselair, le chastel mon oncle. Et je li demandai à cui il estoit; et il me dist que il n'estoit à nullui, et que il demourroit avec moy, se je