SIÈCLE
Jean de Lavalette seigneur de Cornusson, des Montetz, Lestaing, Parisot et autres lieux, gentilhomme ordinaire de la Chambre du Roy, cappitaine de cinquante hommes d’armes de ses ordonnances seneschal de Thoulouze et d’ Albigeois, à tous ceulx qui ces présentes verront, salut -, savoir faisons et attestons huy datte des présentes à l’issue du conseil du matin, par devant Me Jean de Loppe, conseiller du Roy nostre sire, son juge et magistrat présidial en nostre séneschaulcée, avoir comparu M. Fr. André de Puylobrier, chevalier de l’ordre hospital Saint-Jean de Jérusalem, commandeur du Condat, recepveur et procureur général dudict Ordre ou Prieuré de Thoulouze ; lequel, en présence de Me Jean Dupuis, procureur du Roy en nostre dicte senechaulcée, auroit dict et remonstré que par contract passé en l’universel clergé de France solempnellement estipulé le 3e jour du moys de juing 1586, icelluy clergé impose sur tout ledict clergé de France la somme de 13,000 livres tournois..., revenans à 12,639 escus pour la composition part et pourtion de Roudiens, que sont les commanderies et leurs dépendances appartenans audict Ordre, que se lèveront par chescune année aulx termes accoustumés durant dix années..., soulz la, convention que au cas où aulcung chevalier commandeur soit expolié de sa commanderie et revenu d’icelle par hostillité et viollance à l’occasion des troubles, déduction et descharge luy en seroit faicte au prorata de l’expoliation...
Auquel temps du contract et despuis, les troubles se sont eslevés en plusieurs endroits du Prieuré de Thoulouze et aultres lieux où sont assizes les commanderies et membres en dépendants par les ennemys de Dieu et du Roy, qui ont levé les armées, fortiffié les villes et forts, font levée de gens de guerre tenans la campagne, pilhé rançonné et font tous les autres actes d’hostilité, inhumaneté et exécrables et à cette occasion occuppé presque toutes les commanderies audict Prieuré de Thoulouzé :
