CHAPITRE VINGT SIXIESME

Une femme différant le voyage qu’elle voulait faire en ce sainct lieu devient muette, et le poursuivant recouvre la parole

La mesme année, en la ville de Constances une femme desira venir en pèlerinage en ceste eglise et tant ardemment que jaçoit que son mary, nommé Robert Le Serrurier, fut extrêmement malade, neantmoins quittant toutes choses, elle sortit de la ville bien délibérée d’accomplir son voyage. Mais un chacun trouvant cela fort estrange, et de plus voyant que son mary tiroit à la fin, on envoya après elle, qui estoit desjà à demye lieue de la ville, un serviteur pour la rappeller et luy dire qu’elle vint voir mourir son mary. Ces paroles l’ayant touchée au cœur, elle résolut de retourner, et voicy qu’au mesme temps elle perdit la parole. Neantmoins ne faisant aucune reflection sur cette punition, elle retourna en sa maison, sans dire un seul mot, de quoy ses parents s’esmerveillerent grandement. Et voulant y apporter quelque remede, ils la menèrent à l’eglise cathédrale devant l’autel deNostre Dame du Puy ou, par l’invocation de la Vierge, il se faisoit plusieurs miracles, et là ayant passé un bon

* Mss. II9 Fol. 44. A Fol. 35.

espace de temps sans aucun amendement (car Dieu reservoit ce miracle pour son Arcange) un chapelin de ladite eglise la conseilla de poursuivre le voyage qu’elle avait promis de faire. A quoy condescendant aysément, elle se mit en chemin, l’an susdit le quatriesme de juillet, et estant parvenue au lieu où elle s’en estoit retournée en son logis elle recouvra la parole, ce qui l’excita davantage à poursuivre son chemin vers ce Mont où elle arriva le lundy au soir, cinquiesme jour de juillet, et fit ses prières devant l’autel St-Michel, publiant partout ce qui luy estoit arrivé.