AUTRES FERMAUS D OR MENDRES, A PIERRERIE ET A PERLES

3549. Un fermail d'or d'un cercle qui a quatre quarrés '; et sur la quarré basse a vi solais, cizellez à menus grains; et tient sur icelle quarré l'espinete du fermail à une charnière derrière, et se ferme dedens un crochet devers la pointe; et sur la quarré de dehors qui est plus large que l'autre et fait le tour du cercle, a VIII branches dont chascune est de quatre reploiées, cizellées à menus grains ; et sur la haute quarré est encavé un esmail noir qui va tout autour, et y a escript de lettres espargniés : « Cuer « de vray ami Doit avoi?' mercy », et entre les mos a rozettes fleuretées et branchetes. Dedens ledit cercle sont deux angles nus, qui ont leurs rains couvertes chascun d'un drap d'or, et entre eulz tiennent à leurs quatre mains un livre ouvert ouquel a escript : « Alleliiya » noté: et font les angles semblant de le chanter; et sur le haut et le bas dudit livre s'i assemblent II fueilles d'espine, et ont chascune deux tiges reploiées; et sur le dehors dudit livre est comme un escrinet sans couvercle. Et est ledit fermail garni de pierrerie et de perles en la manière qui sensuit : c'est assavoir que sur le milieu dudit livre est un grant chaaston d'or qui y est rivé, siet entre quatre crampons un gros saphir bellonc, percié du lonc, à haute face et roonde, de couleur assez pale et de clere eaue, et sur le bas de sa face a une grande fosse, et près d'un crampon, à son costé dextre, a une autre fosse mendre encavée, et est extimé peser environ XL caras. Autour dudit saphir, sur les hors dudit cercle sont, sur quatre haus chaastons qui y sont rivez, quatre balays, chascun tenu à quatre crampons, et entre iceuls quatre troches, chascune de quatre grosses perles rivées à brochetes, partans en crois d'une broche costée, sur laquelle siet en un chaaston un dyamant dedens chascune d'icelles troches. Et le balay qui est à dextre dudit saphir est sur le roont un pou longuet et agu dessus, à plate face, de belle couleur sur la rose et de gentile et clere eaue