GARNITURES DE BOUTONS
de VI fueillages, chascun de v fueilles, et ou milieu a comme un
compas assez roont, tout embouti et féru en estampe et creté
tout autour, tant compas comme fueillages; et sont tous rivez
sur une planche d'or, tournée en fourme d'un compas à vi fueilles
comme cretez, qui ont entre leurs tiges vi fenestrages à jour sur
tours de cuers; et sur ycelui compas est une espinete, qui tient
à charnière derrière, et devant se ferme à un crochet pour tenir
au chaperon. Et sont les dessusdis trois boutons garnis dessus
chascun d'une esmeraude ou milieu, entre quatre crampons, sur
un chaaston rivé au petit compas embouti qui est ou milieu; et
l'une est assez bonne et clere, mais les autres deux sont feellées,
trassées et fort diffamées; et sur les fueillages d'environ sont
rivés VI petis chaastons en chascun, sur lesquels sont, entre
un crampons, assis vi très petis balais de pale couleur et de
petis pris, extimés peser chascun, l'un par l'autre, demi carat ; et
entre iceuls fueillages sont rivez en chascun d'iceulstrois boutons,
VI petites perles sur le roont, les unes meilleurs que les autres,
extimées peser chascune, l'une par l'autre, i carat et demi. Et
les deux autres boutons sont chascun de viii fueillages, dont
les quatre sont pareuls de ceuls des autres boutons, et les quatre
sont sur la fourme d'un cuer; et ou milieu a comme un compas
de la devise des compas qui sont es autres boutons, fors que il
est plus grant et est tout embouti, féru en estampe et creté
autour comme les autres dessus devisez et rivé tout aussi de
ladicte devise. Et la planche est d'un compas semblable, fors
que il est à viii fueilles et viii fenestrages de la devise des autres;
et l'espinete y est assize en chascun aussi pareillement; et sont
iceuls deux boutons garnis dessus chascun d'une grosse perle ou
milieu, dont l'une est plus grosse que l'autre, et sont toutes très
obscures et fort feellées et diffamées, extimées peser chascune
l'une par l'autre v caras, et sur le compas du milieu siéent
comme en un chaaston et sont rivées à une broche sur leur
face, là où a un boutonnet esmaillié d'asur. Et sur les fueillages
d'environ sont assis sur chascun bouton, en chastons, quatre
petis balays destains extimés peser chascun, l'un par l'autre, demi
carat, et quatre petites esmeraudes de très petit pris. Et ainsi
appert que sur les dessusdis v boutons sont assis xxvi rubys,
XI esmeraudes dont il y en a trois grandettes et xx perles dont
