YMAGES D ANGLES D ARGENT DORES

392. Une grant ymage de saint Raphaël estant sur un grant entablement à six quarrés, et en chascune quarré a quatre fenestres doubles, lesquelles sont esmaillées par dessous d'esmail azuré et vert; et entre deux fenestres a un piller de maçonnerie, et dessus a pluseurs grans souages et orbevoies, dessous lesquelles a esmail azuré. Et est ledit entablement porté de vi lions gisans chascun sur un bas entablement à souages. Dessous les piez saint Raphaël est un diable enchaienné et tient les chaiennes à aneaux rons que ledit diable a ou col, es bras et es jambes; et par derrière a ledit diable ii elles de serpent semées de pluseurs boutonnez esmailliez. Ledit saint Raphaël est vestu d'un mantel qui ferme devant sa poitrine à un esmail ouquel a pluseurs pierres vermeilles et verdes, et tient en sa main destre un glaive ouquel a un pennon et en sa main senestre tient la chaienne dont ledit diable est lié, et par derrière a deux grans elles dorées et cizellées. Et poise vi^^^ii mars.

393. Une ymage de saint Michiel ' d'argent doré, tout armé, et dessus ses armes a vestu un mantel, et a ses deux pies sur un serpent qui a elles esmailliés d'asur dehors et dedens, et sont lesdictes elles entre les jambes de saint Michiel; et tient ledit saint Michiel en sa main destre une longue crois d'argent blanche de laquelle il boute le bout en la gueule dudit serpent, et ou bout d'en haut de ladicte crois a un pennon ^ à une crois