Duyt, habile, instruit

langaige lyonnois luy donnèrent l'honneur en disant : « Vey-vo cestou malotru ! il a mieulx fay que tous los autres. » Et de tout le reste de la compaignie acquist si bonne grâce que le bon roy Charles dist à son soupper, pour plus l'honnorer : « Par la foy de mon corps! Picquet a ung commencement dont à mon oppinion fera saillie à bonne fin. » Et dist alors au seigneur de Ligny : « Mon cousin, je ne vous feiz de ma vie si bon présent que quant je le vous donnay. » A quoy respondit ledit seigneur : « Sire, s'il est homme de bien, y aurez plus grant honneur que moy, car le bon los que luy avez donné l'a fait entreprendre tout cecy. Dieu vueille qu'il puisse continuer ! mais son oncle, l'abbé d'Esnay, n'y prent pas grant plaisir, car il a eu ses escus et ses acoustremens à son crédit; » dont desjà estoit le roy assez informé. Si se prent à rire, et toute la compaignie.