REMEDE DE LA RONGNE

ONTRE la rongne au dos des moutons, ou aultres bestes à laine, on doit faire oignemens de vieil oingt de porc : de vif argent et d'alun de glace, et de coupperose, de vert de gris : et mesler tout ensemble avec ung peu de farine de semence de nesle ou de cendre commune : et confire avec le vieil oingt. Et de cest oignement doit-on oingdre la rongne; si guariront les bestes. Et aux aigneaux convient ouvrer plus doulcement, pource qu'ilz sont plus tendres : prenez vieil oingt, vert de gris et cendres de serment de vignes. Et qu'il n'a serment, preigne des genefvres : et soit tout broyé ensemble pour oingdre les

aigneaux : si gariront. Et n'y convient mettre vif argent : ne alun de glace : ne coupperose : car ilz sont trop fors corrosifz, et pourroient faire mourir les aigneaux. Et se aulcun pauvre mesnager ne pouvoit finer des choses dessusdictes : doit prendre des genefvres verds et couppés mesmement par tronçons, et les faire bouillir en lessive cendre de dauves, et puis broyer les tronçons ; et les faire boullir de rechef: tant qu'ilz soient bien amolis, et qu'ilz ayent attraict la substance et la force de la cendre : et vault à faire oingture à garir et curer ladicte rongne, tant à bestes surannées que aigneaux.