Modérer

trop aheurté et affermé à ton oppinion de faire et acomplyr ta voulenté, supposé' que le désir te semble bon, et pren le conseil de moy ou d'aultruy qui à ce se congnoistra, et par especial de tes souverains se tu es en religion : car par aventure tu t'en pourroys repentir après , ou te pourroyt desplaire ce que par avant te plaisoit et te sembloit bon, et laisseroys tout , et seroit une honte pour toy. Car aulcunesfois n'est pas besoing ne expédient d'acomplyr toutes bonnes voulentez , ne le contraire de tous pointz débouter. Il est expédient d'aulcunesfoyz restraindre et refréner ses désirs, supposé mesmes qu'ils soyent bons, car trop grant importunité d'acomplyr sa voulenté est cause de distraction de cueur, et de donner esclandre à aultruy, et de troubler soy mesmes et faire tomber en aulcun inconvénient.

Et pource il se fault faire violence aulcunesfoiz et fort résister à son appétit, et ne prendre pas garde à ce que la chair veult ou refuse, mais soy efforcer qu'elle soit tousjours subjecte à Dieu et à raison. Et pource on la doit tant longuement chastier et faire subjecte et obéissante à l'ame jusques à tant qu'elle soit appareillée à toutes les choses que l'esperit luy commandera selon Dieu et raison , et qu'elle apprengne d'estre contente de peu, et non pas désirer superfluité , mais soy delicter en simplesse et chose de peu de valeur, et ne murmurer point en quelque contrariété qui luy adviengne.