COMEDIE. S
ELIANTE.
Mais, encor, qui vous peut...
ALCESTE
Ah ! tout est rüiné, le suis, ie suis trahy, ie suis assassiné :
Celimene... Eust-on pû croire cette nouuelle? Celimene me trompe, et n'est qu'vne Infidelle.
ELIANTE.
Auez-vous, pour le croire, vn juste fondement ?
PHILINTE
Peut-estre, est-ce vn Soupçon conçeu legérement, Et vostre Esprit jalous, prend, par fois,des Chimeres...
ALCESTE
Ah ! morbleu, meslez-vous, Monsieur, de vos Affaires. C'est de sa Trahison n'estre que trop certain, Que l'auoir, dans ma poche, écrite de sa main. Oüy, Madame, vne Lettre écrite pour Oronte, A prodüit, à mes yeux, ma disgrâce, et sa honte; Oronte, dont i'ay crû qu'elle fuioit les soins, Et que, de mes Riuaux, ie redoutois le moins.
PHILINTE
Vne Lettre peut bien tromper par l'apparence, Et n'est pas, quelquefois, si coupable qu'on pense.
ALCESTE
Monsieur, encor vn coup, laissez-moy, s'il vousplaist, Et ne prenez soucy que de vostre interest.
• ELIANTE.
Vous devez modérer vos transports, et l'outrage...
ALCESTE
Madame, c'est à vous, qu'appartient cet Ouurage, C'est à vous, que mon cœur a recours, aujourd'huy, Pour pouuoir s'affranchir de son cuisant ennuy. Vengez-moy d'vne ingrate, et perfide Parente, Qui trahit, lâchement, vne ardeur si constante; Vengez-moy de ce trait qui doit vous faire horreur.
ELIANTE.
Moy, vous venger ! comment ?
ALCESTE
En receuant mon Cœur, Acceptez-le, Madame, au lieu de l'Infidelle, C'est par-là, que ie puis prendre vengeance d'elle : Et ie la veux punir par les sincéres Vœux, Par le profond Amour, les Soins respectüeux, Les Deuoirs empressez, et l'assidu Seruice Dont ce Cœur va vous faire vn ardent Sacrifice.
ELIANTE.
le compâtis, sans doute, à ce que vous souffrez, Et ne méprise point le Cœur que vous m'cflrez : Mais, peut-estre, le Mal n'est pas si grand qu'on pense, Et vous pourrez quitter ce Desir de Vengeance. Lors que l'Injure part d'vn Objet plein d'Appas, On fait force Desseins, qu'on n'execute pas : On a beau voir, pour rompre, vne Raison puissante, Vne Coupable aimée, est, bientost, innocente; Tout le mal qu'on luy veut, se dissipe aisément, Et l'on sçaitceque c'est, qu'vn Courroux d'vn Amant.
ALCESTE
Non, non, Madame, non, l'Offense est trop mortelle, Il n'est point de retour, et ie romps auec elle; Rien ne sçauroit changer le Dessein que i'en fais, Et ie me punirois, de l'estimer iamais.
La voicy. Mon Courroux redouble à cette aproche, le vais, de sa noirceur, luy faire vn vif reproche, Pleinement, la confondre, et vous porter, aprés, Vn Cœur tout dégagé de ses trompeurs Attraits.
