RÉPONSE DU PEUPLE

donne pasture vous ne povez pas secourir ne defendre et vous laissez estre comme exiliez sur vostre mesmes pays que delaisser ne voulez ne garder vous ne savez. Quelle chose est ce doncques qui peut si refroidir et tant rabaisser voz couraiges ? Les ennemis ne sont de fer immortelz ou indiviables ne que vous, ilz n’ont glaives ne armeures que vous n'ayez les pareilles, ne ne sont en si grant nombre que ne soiez autant ou plus; leur eur ne sera pas Fortune leur estre tousjours propice, qui de sa nalture est envers tous muable. Si fault par force dire que, s’ilz ont riens d’avance qui les - eslieve sur vous, c’est hardement de courages, et, se vous avez riens qui soubz eulx vous deprime, c’est la multitude de voz pechiez qui convertit vostre cuer en fuye et laissez estaindre la lumiere de vostre gloire et destruire vostre seigneurie devant voz yeulx, sans remede ÿ querir ne mectre, si non que la grace de Dieu y euvre de soy, a laquelle deservir vous metez petite peine, et ne povez en ce point longuement temporiser sans veoir decheoir le rom françois a vostre pardurable vitupere et malediction.

L'acteur.

Ces parolles moult aigrement et de cuer couroucié disoit au dessus escrips celle dame tresadoulee et de ses beaulx yeux, dont les ruisseaulx de larmes couroient, regardoit si effroiement leur desroyé maintien que bien sembloit soy sentir d'eulx injuriee ou mescogneue. Et aprés ce que chascun

se fu longuement tenu de parler, cellui qui gisoit reversé

sur la terre, plaintif et langoureux et tant actaint de mal que

nulle vertu ne lui estoit demouree, si non la voix et le cry,

prinst a parler et respondre ce qui s’ensuit :