ACTE I, SCENE III

BETA

Seigneur Augustin, vos raisons et la pitié de vostre mal m'ont tellement vaincue que je suis disposée de vous obéir; et encorcs que je trouve la partie bien forte, si mettray-je toutes mes forces et mon crédit, et inventeray tous les moyens que je pourray pour vous contenter.

AUGUSTIN

Contenter, Beta! Si vous le faictes, je tiendray la vie de vous, et vous recongnoistray pour mère : car véritablement mère se peult appeler celle qui donne la vie, délivrant autruy de mort; etaffin qu'il vous souvienne mieux de moy, prenez cependant ce petit présent.

BETA

Ha ! seigneur Augustin ! je ne vends point ma peine, et ce que j'en fais n'est que d'amitié.

AUGUSTIN

Aussi ne le vous donné-je pas pour recompense, j'espère vous faire plus grand bien; et si vous refusez cecy de moy, je penseray que ne me voulez obliger à vous, puis que ne me voulez en rien estre obligée.

BETA

Or sus donc, puis que vous avez ceste opinion, je le prendray.

Et dictes-moy, quand auray-je response de vous?

BETA

Le plus tost que je pourray. Attendez-moy icy près, je m'en vay achever de les habiller.

AUGUSTIN

Mais quand sera-ce, Beta? Une heure m'est une année.