CHAPITRE LXI

A cel ennort et infourmation faire , fu party madamme la roynne sa mère. De tant le crut le roy plus legièrement , car encore estoit Jehan de Eltem , frère au roy, nouvellement trespassé. S’en fu messire Rogier plus légier de croire. Si fist prendre le dit conte son oncle; et publiquement, devant tout le peuple, lui fist le chief coper; ne oncques ne peut venir à excusacion, et se n’y avoit coulpe. De la quelle mort ceulx du pays, grans et petits , furent moult courouchiés; et en eurent le dit messire Rogier en grant haynne , par quel conseil ce avoit esté; car le dit conte avoit grâce d’estre bon et loyal preudomme ; et fu dommage de sa mort.