CHAPITRE XCIX

A ceste response se partirent du roy et revinrent à leurs hostels , et le laissèrent ensy, pour luy conseillier, l’espasse de trois jours. Et quant revinrent vers luy, il dist finalement qu’il ne trouvoit point qu’il le deuist faire; car s’il le faisoit , il donroit à entendre au roy d’Engleterre qu’il euist aucun droit à ceste querelle. Et quant il virent que aultre response n’en pooient avoir, il prirent congiet et retournèrent à Valenchiennes devers le conte et les Englès. Si contèrent tout ce que le roy leur avoit dit et réspondu. Et quant les Englès oyrent le response, s’en eurent grant merveille, et s’en tinrent moult mal content du roy de France. Lors demandèrent conseil au conte, et le conte leur respondy : « Vous savez bien sur quel estât vous estes party du roy vo seigneur , et vous véez que vous avez trouvé. Si l’en dittes la vérité, et sur ce il ait advis. » Dont dist levesque de Nicolle : « Sire, nous savons bien que, quant nous revenrons par delà, messire le roy ne requerra aultre conseil que de faire guerre au plus tost qu’il porra, considéré ce que nous avons trouvé. Si nous sambleroit bon que, à vo titre, fuissent mandé, de par le roy et de par vous, aucuns des seigneurs de l’Empire, affin qu’ils venissent en lieu où vous et nous peussons parler à eulx , pour eulx prier qu’il soient prest de faire le confort qu’il ont promis au roy no seigneur. » Adont dist le conte : « Vous conseilliés bien; si le ferons ainsi. »