CHAPITRE CV

Ouant le roi eut bien-vingniet son hérault et seslettres luttes, si lui dit :«Nostre amy Cardoel, dittes des nouvelles et vos crédences. «Dont dist le hérault : «Sire, il est vérité qu’il y a ung chevalier de là la mer qui s’apelle le sire de Noielle, et est Poitevins, qui dist et maintient : que pour pluiseurs services qu’il fist au roy vostre père, on lui doit la somme de trente mille florins; et l’en fu baillié en plesge la ville et chastellerie de Condom ; dont si comme il dist , il n’en pooit avoir nul paiement ; si s’en plaindy au roy de France , et monstra ses lettres , et fu remis en le chambre de parlement; et là lui fu adjugié que vous estiés tenus en celle debte, et à rendre tous coulx et frais qui de ce se sont ensievy. Dont, pour exécuter ces exploit, il eut commision générale à prendre et lever par tout en vostre terre de Gascongne , tant qu’il fust satisfiés de la somme dessus diste et des frais qui en sont. Et y establi le roy ung procureur, appelé maistre Remon , à le prière du chevalier ; et par la virtu de la procuracion , il vinrent à Condom, et se volrent mettre en saisine dudit chastel; et eurent tant de parolles au chastelain , qu’ils se couroucèrent l’un à l’autre; et tant y eust que le chastellain féry maistre Remon d’ung gros baston , si qu’il lui rompy le teste, présent le sire de Noïelle; et prist le chevalier et mist en prison , en disant qu’il estoit moult oultrageux , qui tels explois osoit faire sur les héritages du roy d’Engleterre. S’a de ce eu le roy de France grant indignacion ; et dist que vostre terre par de là , pour ceste cause est confiquie, avec autres mesfais que vous avez fais. Si y sont envoié ces grans seigneurs cy dessus nommés , qui font très grant guerre et si dure qu’ils ont jà pris Prudère, Sainte Rasille et Saint Makaire. Et quant je me partis du pays il séoient devant Peme et devant Blayes. Si vous prient les seigneurs et bonnes villes du pays que vous les confortezhastivement, ou vous les porez perdre. »

PRIMITIVE