CHAPITRE CLXXXII

Ces nouvelles furent tantost à Valenchiennes devers monseigneur le conte, environ l’eure de mie nuit. Et quant le conte oy ces nouvelles, il en fu moult courechiés. Si se party de le Salle sans arroy, et vint jusques oumarchiet; et dîst à ceulx qui le béfroy gardoient : «O vous malle gent qui là estes, qui véez le dommage de vos voisins, pourquoy ne sonnez-vous la clocque ; si s’esvilleront ceux de la ville. » Dont, à larequeste et commandement du conte, si fu là clocque sonnée. Lors s’esvillèrent toute manière de gens. Si s’armèrent et vinrent ou marchiet ; mais le conte ne voult mie attendre les derrains, ains se party et dist : «Qui m’aime, se me sieuwe.» Adont estaient en la ville messire le sénescal de Haynnau, messire Gerart de Bertain l, messire Henry d’Anthoing, le sire de Roisin, le sire de Gomingnies, le sire de Pottielles , le sire de Mastaing, le sire de Waregny , le sire de Bossut et pluiseurs aultres qui montèrent à cheval. Mais quant le conte eut sa routte vinrent à Menin, on lui dist qu’il y aloit sans raison et queles François estoient retrais et retournés vers Cambray.