CHAPITRE CLXXXIX

Après le destruccion d’Aubenton, fu destruit Signy le grand et le petit; et des hamiaulx de là entour, ars et destruis plus de quarante; et puis retournèrent en Haynnau. Si donna le conte à ses gens congiet pour ceste fois. Si s’en rala chascun en son lieu , et son oncle de Beaumont s’en rala moult joieu. Si retourna le conte à Mous, pour avoir advis comment il acquerroit amis à tous lez, pour mener sa guerre à l’esté encontre François. Et ainchois qu’il se partist du pays, il ordonna etgarny les fors et les bonnes villes; et par espécial il mist monseigneur Jehan de Haynnau son oncle, alant et venant par le terre, avec quatre chevaliers : le sire d’Antoing, le seigneur de Waregny, le sire de Vertaing et monseigneur Henry de Hufallise. Après il mist au Ouesnoit le sire de Fauquemont à cent armures de fer. Il mist à Landrecies le sire de Pottielles, à Avesnes le sire de Montigny-Saint-Christophe , à Maubeuge monseigneur Tiery de Wallecourt mariscal de Haynnau , à cent hommes d’armes. Après il mist à Bouchain trois chevaliers almens, qui tous trois avoient à nom Conrart, qui bons chevaliers estoient ; à Escaudemire il mist messire Gérart de Sassegnies; à Thun-l’Evesque messire Gérart de Limosin, bons chevaliers Englès; avec lui les deux frères de Maugny, Jehan et Thiery ; ou chastel de Rieullay le sire de Rousne et le sire de Goullesmes ; et les autres forteresses recommanda-il aux autres barons de son pays, qui y entendissent ensy que pour leur honneur et le sienne. Et ainsi ordonna monseigneur Jehan son oncle, bail et gouverneur du pays de Haynnau jusques à son retour. Assez tost après il se party, et s’en ala par devers l’empereur qu’il trouva à Coulongne, qui le rechupt à moult grant joie; car l’empereur avoit sa seur. Si retournerons ung petit à parler du roy de France.