CHAPITRE IX
Cy dit comment te saige mareschal fit édifier deux forts chasteaux, l’un sur le pont de Jeunes, l’autre autre part ; et comment il reprint à remettre en estât les choses ruineuses et perdues.
Avec ces belles ordonnances dessus dictes , le saige gouverneur qui bien sçavoit ce que dict est , que à bien gouverner les gens de par delà convient que on se monstre estre le plus fort , et aussi que on le soit ; afin que les Jenevois pust mieulx seigneurier, c’est-à-dire les rebelles, non mie pour leur faire extortions, ne grief, ne pour user envers eulx de nulle tyrannie, ne les tenir en indue subjection, mais seulement pour leur oster toute hardiesse de eulx rebeller comme ils avoient accoustumé , si volonté leur en venoit, tantost fit cercher ouvriers et maistres de massonnerie bons et propices à l’œuvre que faire
vouloit. Si fit bastir et hault lever deux beaux et forts ehasteaux en la ville de Jennes, dont l’un est assis sur le port de Jennes , là où les galées et le navire sont et arrivent, que on appelle la Darse. Si est moult bel et fort à deux grosses tours. Si le fit afin que le dict navire en fust plus seurement contre tous ennemis, et tous griefs qui advenir pourroient. Ce dict œuvre fut bien advancé, tant que selon le devis et ordonnance du dict gouverneur fut le chastel âccomply et parfaict, grand, fort et bel, comme aujourd’hui on le peut voir. Quand ce fut fait , le saige gouverneur le fit très bien garnir d’artillerie et de toute manière de trait , et de choses qui à deffense appartiennent , et de bonnes gens d’armes. Et ainsi s’en tint saisy, tant que dedans et dehors put aller à sa poste, quelque chose que advenir pust , et nul n’entrer ne issir sans son congé. L’autre chaslel fit édifier en la plus forte place de la ville, et est appellé Chastellet, qui tant est fort que à peu de deffence se tiendroit contre tout le monde. Si est fait par telle manière que ceulx d’ieeluy chastel peuvent aller et venir, maugré tous leurs ennemis, en l’autre chastel qui sied sur le port que on dict la Darse. Deux aultres beaux chasteaux fit- il depuis édifier dehors la cité, l’un en un lieu que l’on dict Chaury, et l’autre à Lespesse. Avec ces choses tous les ehasteaux et forteresses de dehors la cité, qui sont appartenans à la seigneurie de Jennes, dont moult en y a de beaux et de notables, lesquels plusieurs des plus forts d’entre les Genevois s’estoyent attribués, et saisis s’en tenoient, fist tantost rendre et restituer à la dicte seigneurie, par ce que il envoyagent faire commandement, soubs peine de mort, que tantost et sans délay fussent rendus. Auquel commandement feut obéy sans contredit. Item fit monter sur mer gens saiges et bons, lesquels il envoya de par le roy et de par luy faire visitation sur toutes les terres et seigneuries des Genevois, poursçavoir de leur estât et gouvernement. Et tiennent les dicts Genevois très grandes et notables seigneuries ès parties du Levant, sur la mer Majour, et en autres parties : comme Capha en Tartarie, qui est une grosse ville marchande. Et en Grèce tiennent la cité de Péra, qui est moult belle ville, et sied coste Constantinoble. Item i’isle de Scio où croist le mastic, au droict de Turquie. En Cypre
tiennent Famagouste, qui moult est bonne cité. Et tirant à la tane, en la mer Majour, outre Capha , et par de là Gonstantinoble quatorze cents milles , tiennent grand pays et foison de forteresses, sans les isles, dont en y a plusieurs là et autre part bien habitées et riches, et autres terres qui long seroit à dire, qui toutes sont soubs la seigneurie de Jennes. Et advint , environ ce temps, que une isle bonne et bien peuplée, qui sied assez près de Jennes, appellée l’isle d'Elbe, meut guerre contre les Genevois. Si y envoya le gouverneur quatre galées bien garnies de gens d’armes , qui mie n’y allèrent en vain; car tant y feirent que l’isle gaignèrent.
