CHAPITRE IV

Comment le mareschal assembla à conseil les plus s^iges de Jennes, et les paroles que il leur dit sur le faict de 1 Eglise.

Adonc le mareschal commença à parler, et prit sa narration dès le commencement du schisme; et dict: que comme ceste douloureuse pestilence en l’Église, qui jà avoit duré l’espace d’environ trente° ans, dont c’estoit grand mesclief, commencast du temps et au vivant du très chrétien et saige roi Charles cinquiesme du nom, lequel parles mérites de sa juste vie, et la grande vertu et prudence qui en luy estoit , a esté tenu, est et tousjours sera le plus juste prince, le plus saige et de meilleur vie que roy qui fust en France depuis le temps desainct Louis, ne mesmement autre que on sceut au monde en son vivant , et qui le plus usoit de conseil , sans lequel ne fist quelconque chose , si fut vray que , dès que les premières cslections eurent esté faites, qui furent comme chascun sçait assez près 1 une de l’autre, c’est à sçavoir la première à Rome, et puis tantost ensuivant l’autre par deçà , le roy Charles eut par plusieurs fois lettres des cardinaux qui luy notifièrent toutes ces choses , et les causes des advénemens des faits par eulx exécutés. Mais quoy que ils luy certifiassent la seconde eslection estre juste et vraye, et la première de nulle valeur , le saige prince ne se tint mie à tant : ains voult par grand soin s’informer de la manière de toutes les deux eslections, pour avoir advis et conseil pour lequel des deux il se debvoit déclarer. Et pour estre de ceste chose certainement et au clair informé; afin que il ne pust errer , envoya certains preud’hommes prélats de son conseil en Avignon , devers les cardinaux qui adonc là estoyent, pour bien les interroger de la manière , et pour prendre et avoir les sermens d’eulx, que sans faveur diroient la vérité du fait , et lequel des deux eslus debvoit estre tenu pour vraye pape. Si fut ainsi : que quand les dicts envoyés de par le roy eurent faict comme ils durent leur légation aux cardinaux, adonc les dicts cardinaux tous jurèrent l’un après l’autre, sur le corps de Jésus-Christ sacré , et prirent sur la charge et damnation de leurs âmes de dire vérité. Après prirent à dire comme ils estoyent à Rome enclos au conclave , en intention d’eslire sans nulle faveur, mais comme Dieu leur administreroit par la voie du

Sainct-Esprit , les Romains, par maligne volonté et à grand fureur de peuple, s’assemblèrent autour du palais, et prindrent. à crier sur eulx par grands menaces que ils vouloient avoir un Romain , ou au moins un Italien. Si les tenoient là assiégés les dicts Romains , qui sans cesser cryoient à leurs oreilles. Pour laquelle cause, eulx tout troublés d’iceluy tumulte pour eschever péril de mort, où ils se voyoient, conclurent entre eulx que ils feindroient avoir eslu l’archevesque de Rari , qui estoit Italien. Et ainsi le firent , et par celle voye les Romains furent appaisés : mais bien estoit leur intention , que, au plus tost que ils pourroient, se partiroient de là, et laisseroient le dict eslu, qui par force avoit esté mis en la chaire , et non mie par droicte voye. Si ne le réputoient point pour pape, nonobstant qu’ils luy eussent fait toutes les cérémonies qui y affièrent , pour ce que ce avoit esté par contraincte.Et ainsi qu’ils avoient proposé de le laisser, le firent. Et quand ils furent venus en Avignon, adonc ils se mirent ensemble, et par bonne et saincte délibération eslurent un autre : lequel ils affermoient, sur leur part de paradis, et sur le péril de leurs âmes que celuy estoit droict et vraye pape , et que à iceluy debvoit toute la chrestienté obéir comme au vray pasteur. A toute ceste certification et lettres scellées des sceaulx de tous les cardinaux, qui ainsi estre vray le tesmoignoient, s’en retournèrent vers le roy les dicts ambassadeurs , qui luy rapportèrent ce qu’ils avoient trouvé. Mais encore ne se tint pour satisfait le couraige du roy, et ne luy suffit atant ; ains voult luy mesme ouïr parler aulcuns d’eulx, c’est à sçavoir de ceulx qui esloient réputés pour les plus dignes, et les plus saiges preud’hommes cardinaux , et autres prélats , qui ès dictes eslections avoyent esté. Si les envoya quérir, et fit venir vers luy à ses propres cousts et dépens. Et pour les ouïr, quand venus furent, il assembla le conseil de tous les prélats, et des plus saiges maistres en théologie de son royaume et d’ailleurs. Si furent à celuy conseil moult examinés les dicts cardinaux et les prélats de tous poincts qui pouvoient toucher la conscience sur le dict faict, auxquels ils respondirent sur chascun article si suffisamment que il n’ y eut que dire. Si fut la chose moult bien discutée, comme il affiert à si pesante besongne , et non mie tost

ne hastivement, mais prolixement, et en long temps, afin que point d’erreur n’y pust estre mussée soubs dissimulation , ne que aucun scrupule pust demeurer en conscience. Toutesfois à la parfin, par le conseil de tous les prélats, et des susdicts solemnels maistres en théologie, et de tous les saiges que il put assembler, fut conclu , que toutes choses regardées et bien discutées, le roy et toute la chrestienté se debvoient déclarer et tenir à la seconde eslection , et ainsi l’affermoient pour vérité, etjuroientet prenoient sur leurs âmes que faire se debvoit. A laquelle chose à bonne cause le roy adjousta foy, en disant qu’il n’estoit pas à croire ne vraysemblable que tant de preud’hommes se voulsissent damner pour la faveur d’un tout seul homme. Et ainsi délibéra et manifestement se déclara pour la deuxiesme eslection ; laquelle chose il escripvit à tous les autres roys et princes chrestiens ses alliés, comme en Espaigne', en Arragon, en Escosse , et ailleurs. Lesquels , considérée l’authorité de sa preud’hommie et de son grand sçavoir, adjoustèrent foy à l’enqueste qu’il en avoit faicte , et pareillement se déclarèrent. Tonte ceste narration fit le mareschal aux Genevois en iceluy conseil; et plusieurs autres choses à ce propos leur dit, que je laisse pour briefveté. Si fit après sa conclusion , en disant que par ainsi pouvoient voir et congnoistre que , sans grande délibération et advis ne s’estoyent pas condescendus les François à rendre obéissance à la seconde eslection. Et que s’il leur chéoit au cœur, et sembloit que si digne personne que estoit le saige roy Charles en eust faicte suffisante information et enqueste comme il leur avoit recordé (laquelle chose estoit assez notoire que maintes gens encore vivans savoient, et luy mesme certainement le savoit, car ce avoit esté de son temps, nonobstant que il fust moult jeune adonc; mais assez de fois l’avoit depuis ouy recorder), que ils se voulsissent semblablement déclarer pour nostre partie , si leur conscience s’y adonnoit.

Quand le mareschal eut fini sa parole, les Genevois qui bien et bel avoient noté ce qu'il avoit dict, respondirent que bien l’avoient entendu, mais que la chose leur estoit nouvelle, et si touchoit conscience, et ne debvoit estre délibérée sans grand avis; si penseroient sus, et puis leur en respondroient; et il dict que ce luy plaisoit bien, ni.

Et à tant se départirent; mais depuis par plusieurs fois en furent assemblés ensemble , et tant que à dire en brief , à la parfin, de leur très bonne volonté et sain consentement, comme Dieu pour le bien de chrestienté le voult, se déclarèrent pour nostre partie, et rendirent vraye obéissance au pape. De laquelle chose le mareschal fut moult joieux, et en remercia Nostre- Seigneur. Et ainsi en vint à chef par son grand savoir et prudence ; car c’estoit la nation de toute Italie qui depuis le schisme plus soustenoit en faicts et dicts le party de l’antipape. De quoy tous les saiges et les clercs de la seigneurie de Jennes dient et tesmoignent que ils savent de vray que si tous les roys, princes et clercs du monde les eussent de ce enhortés, suppliés et requis, que jà n’y fussent advenus pour sermons, ne dons, ne offres que leur sceussent avoir faïçt. Si doibt estre réputée ceste chose, comme ils dient , et il est vray, entre les grands faits du dict mareschal , comme miraculeuse ; car par de là ils tiennent que c’est la plus grand merveille, et le plus grand fait d’en estre venu à chef, que de chose qui advint au pays d’Italie , passé a deux cents ans.