LIVRE IL

frotter aux roches d'Irlande, et là rompirent trois de leurs bateaux ès quels messire Jean d’Arondel, messire Thomas Banestre, messire Hue de Cavrelée, messire Gautier Paule, et bien cent hommes d’armes étoient. Des cent en y ot bien quatre vingt péris ; et périrent messire Jean d’Arondel, capitaine de tous, dont ce fut dommage, car il étoit moult vaillant chevalier, hardi, courtois et entreprenant, et messire Thomas Banestre, messire Gautier Paule et plusieurs autres. Et fut messire Hue de Cavrelée en si grand péril que oncques ne fut en pareil ni si près de la mort ; car tous ceux qui en sa nef étoient, excepté sept mariniers et lui, furent tous noyés : mais messire Hue et les autres qui se sauvèrent s'a herdirent aux câbles et aux mâts, et le vent les bouta sur le sablon ; mais ils burent assez et en furent grandement mésaisés. De cé péril échappèrent messire Thomas Trivet et plusieurs autres qui en furent heureux. Si furent-ils moult tourmentés sur la mer; et retournèrent quand ils purent à Hantonne, et s'en vinrent devers le roi et ses oncles, et recordérent leur aventure, et tenoient que messire Hue de Cavrelée fût péri; mais ne fut, ainsi que il apparut, car il retourna à Londres à tout son pouvoir.

Ainsi se dérompit cette chevauchée et armée de Bretagne ; et ne put être le duc conforté des Anglois; dont il lui vint à grand contraire, car toute celle saison et l'hiver les Francois lui firent grand'guerre; et prirent messire Olivier de Cliçon et ses gens la ville de Dinant en Bretagne par nacelles et bâteaux ; et fut toute pillée et robée; et la tinrent depuis un grand temps contre le duc et le pays. Or retournerons aux besognes de Flandre.