LIVRE UL

Quand ils ouïrent ces nouvelles, si eurent un bref conseil, car il leur besoignoit de nécessité. Si ordonnèrent tantôt un trop piteux fait; car il fut commandé et dit, sur peine d'ètre là mort sans merci, que quiconque avoit prisonnier que tantôt il l'occit, et que nul n'y fût excepté ni dissimulé, comme vaillant, comme puissant , comme noble, comme gentil, ni comme riche qu’ fût. Là furent barons, chevalierset écuyers qui pris étoient en dur parti : ni prière n'y valoit rien qu'ils ne fussent morts, lesquels étoient épars en plusieurs lieux çà et là et tous désarmés ct cuidoient être sauvés, mais non furent. Donc au voir dire ce fut grand'pitié, car chacun occioit le sien; et qui occire ne le vouloit, on lui occioit entre ses mains; et disoient Portingalois et Anglois qui donnèrent ce conseil : « H vaut mieux occiré que être occis. Si nous ne les occions, ils se délivreront, entrementres que nous entendrons à nous combattre et défendre, et puis nous occiront, car nul ne doit avoir fiance en son ennemi. »

Ainsi furent là morts et par tel meschef le sire de Lignac, messire Pierre de Ker, le sire de l'Esprès, qui s’appeloit messire Jean, le sire de Berneque, le sire des Bordes, messire Bertran de Barége, le sire de Moriane, messire Raimon d'Ousach , messire Jean Asselegie, messire Monaut de Sarement, messire Pierre de Sarebière, messire Étienne de Vallencin, messire Raimond de Corasse, messire Pierre de Havefane et bien trois cents escuyers du pays de Berne; et des François messire Jean de Rie, messire Geoffroy Ricon, messire Geoffroy de Partenay et plusiears autres. Or regardez la grand'mésaventure, car ils occirent bien ce samedi au soir de bons prisonniers , dont ils eussent eu quatre cents mille francs l'an parmi l'autre.