CHAPITRE XI

Comment nous passasmes le Guichet, habité par Grippe-minaud, Archiduc des Chats-fourrez.

E là passasmes Condemnation, qui est une autre isle toute déserte ; passasmes aussi le Guichet, auquel lieu Pantagruel ne voulut descendre, et fist tresbien, car nous y fusmes faits prisonniers, et arrestez de faict , par le commandement de Grippeminaud, Archiduc des Chats-fourrez, parce que quelqu'un de nostre bande voulut vendre à un serrargent des chapeaux de Cassade.

Les Chats-fourrez sont bestes moult horribles et espouventables ; ils mangent les petits enfans , et paissent sus des pierres de marbre. Advisez, Beuveurs, s'ils ne devroient bien estre camus. Ils ont le poil de la peau non hors sortant , mais au dedans caché, et portent pour leur symbole et devise, tous et chascun d'eux, une gibbeciere ouverte, mais non tous en une manière, car aucuns la portent attachée au col, autres en escharpe, autres sus le cul, autres sus la bedaine, autres sur le costé, et le tout par raison et mistere. Ont aussi les griphes tant fortes, longues et asserées, que rien ne leur eschappe depuis qu'une fois l'ont mis entre leurs serres. Et se couvrent les testes aucunefois de bonnets à quatre goutieresou braguettes, autres de bonnets à revers,