LIVRE V, CHAPITRE XXX

mains, et ceux de derrière comme les pieds d'un homme ; des crocutes, des eales, lesquels sont grands comme hippopotames, la queue comme elephans, les mandibules comme sangliers, les cornes mobiles, comme sont les aureilles d'asne; des cucrocutes, bestes treslegeres, grandes comme asnes de Mirebalais, ont le col, la queue et poitrine comme un lion, les jambes comme un cerf, la gueule fendue jusques aux aureilles, et n'ont autres dents qu'une dessus et une autre dessous ; elles parlent de voix humaine, mais lors mot ne sonnèrent.

Vous dites qu'on ne veit oncques aire de sacre : vrayement j'y en vy onze, et les notay bien.

J'y vy des hallebardes gaucheres, ailleurs n'en avois veu.

J'y vy des menthichores, bestes bien estranges : elles ont le corps comme un lion, le poil rouge, la face et les aureilles comme un homme, trois rangs de dents entrant les unes dedans les autres, comme si vous entrelassiez les doigts des deux mains les uns dedans les autres ; en la queue elles ont un aiguillon, duquel elles poignent, comme font les scorpions, et ont la voix fort mélodieuse.

J y vy des catoblepes, bestes sauvages, petites de corps, mais elles ont les testes grandes sans proportion, à peine les peuvent lever de terre ; elles ont les yeux tant vénéneux que quiconques les voit meurt soudainement, comme qui verroit un basilic.

PANTAGRUEL

iî3

J'y vy des bestes à deux dos, lesquelles me sembloyent joyeuses à merveilles et copieuses en culetis, plus que n'est la mocitelle, avecques sempiternel remuement de cropions.

J'y vy des escrevisses laictées, ailleurs jamais n'en avois veu, lesquelles marchoient en moult belle ordonnance, et les faisoit moult bon veoir.