DU TOME PREMIER
No I.
LETTRES PATENTES d'ÉDOUARD VI.
24 juillet 1550.
Edouard sixiesme, par la grâce de Dieu, Roy d'Angleterre, de France, et llirlande : défenseur de la foy, et suprême chef en terre soubz Christ de l'Eglise d'Angleterre et d'Hirlande. A tous ceux auxquelz ces présentes lettres parviendront Salut. Comme ainsy soit que grandes et graves considérations nous ayent induys spécialement à présent, et aussy pensans ce, de quelle affection et charité il convient que les Princes chrestiens soyent promptz et bien affectionnez envers le sainct et sacré Évangile de Dieu, et à la religion Apostolique, encommencée, instituée^ et donnée de Christ mesme, sans laquelle la police et le gouvernement civil ne peut longuement durer, ne garder son honneur, sinon que les princes et autres hommes puissans, lesquelz Dieu a voulu eslre assis aux gouvernemens des Royaumes, taschent devant toutes choses que par tout le corps de la république la religion chaste et entière soit espandue; et que l'Église instituée et augmentée aux opinions et façons vrayment chrestiennes et Apostoliques, soit conservée par les sainctz ministres, mortz à la chair et au monde : pour autant que nous arrestons, que c'est l'office d'un Prince chrestien, entre autres très-grandes cogitations, pour bien et noblement administrer son Royaume, de pourveoir à la religion et aux calamiteux affligez bannis à cause de la religion. Sachez que considérans non seulement les choses predictes^ et désirans de garder de la tyrannie du Pape l'Église restituée par nous en sa première liberté ; mais aussy ayans pitié de la condition des bannis et estrangers, qui ja assez longtemps y a ont demeurez en nostre Royaume d'Angleterre, estans condamnez à bannissement volontaire à cause de la religion et de
l'Eglise : car nous n'avons point estimé que cela fut digne d'un homme clirestien ne de la magnificence d'un Prince, duquel la libéralité doive estre estraincle ou fermée à povres gens estrangers, profligez et chassez de leurs pays, et se retyrans en nostre Royaume à refuge, ayans besoing d'aides nécessaires à la vie en tel estât. Et pourtant que plusieurs des Alemans et autres estrangers, qui sont venus et viennent journellement en nostre Royaume, tant d'Alemaigne que d'autres pays loinglains, auxquels la liberté de l'Évangile, soubz la domination de la Papauté, a commencé d'estre tachée et opprimée, n'ont point de lieu certain ne place où ilz puissent en nostre Royaume faire leurs assemblées, où ilz puissent entre les hommes de leur nation et de leur langue Iraicter intelligiblement les affaires de la religion, et les choses Ecclésiastiques, selon la coustume et manière de leurs pays. Parquoy de nostre grâce spéciale, et de nostre certaine science et plein mouvement, et aussy par l'advisement de nostre Conseil, nous voulons, concédons et ordonnons, que dorénavant il y ait un temple ou maison dédiée en nostre cité de Londres, lequel ou laquelle on appellera le temple du Seigneur Jésus : où la Congrégation et assemblée des Alemans et autres estrangers puisse estre faicte et célébrée, à ceste intention et propos, que par les ministres de l'Eglise des Allemans et des autres Estrangers, le sainct et sacré Évangile soit interprété purement, et les Sacremens administrez selon la parolle de Dieu, et ordonnance Apostolique. Et par les présentes, dressons, créons, ordonnons, et fondons ce temple ou maison dédiée, d'un Superintendant, et de quatre Ministres de la parolle. Et que lesdictz Superintendant et Ministres soyent et seront de fait, et de nom, un corps incorporé et politique de soy, par le nom du Superintendant et des Ministres de l'Église des Alemans et des autres estrangers, par la fondation du Roy Edouard sixiesme : nous les incorporons par les présentes en la cité de Londres, et créons, dressons, ordonnons, faisons, et constituons réalement, et de fait, par ces présentes un corps incorporé, et politique par le mesme nom, et qu'ilz ayent succession.
Et en outre, de nostre grâce spéciale, et de nostre certaine science et pur mouvement, et de l'advisement de nostre Conseil, nous avons donné, et concédé, donnons et concédons aus-ditz Superintendant et Ministres de l'Eglise des Alemans et autres estrangers en la cité de Londres, tout ce temple ou église des Augustins, qui furent par cy devant en nostre cité de Londres, et toute la terre, le fond et le sol
de ladicte église, excepté tout le cœur de ladicte église, et la terre, fond et sol d'yceluy. Lesdicts Superintendant et Ministres et leurs successeurs auront et jouyront dudit temple ou église, et des choses susdictes, fors des choses exceptées, pour le tenir de nous, et noz hérétiers et successeurs, en pure et franche aumosne.
En outre nous donnons de l'avisement predict et de nostre certaine science, et noz mouvemens predictz, par ces présentes nous concédons ausdictz Superintendant et Ministres^ et à leurs successeurs, pleine faculté, puissance, et autorité d'augmenter, et faire plus grandz nombres de Ministres, de les nommer, et appunctuer de temps en temps telz et semblables Ministres, pour servir audict temple, qu'il semblera astre nécessaires ausdictz Superintendant et Ministres. Et seront toutes ces choses selon le bon plaisir du Roy. D'avantage nous voulons que Jean a Lasco Polonnois de nation, homme fort honorable, à cause de son intégrité et innocence de vie et de mœurs, et de sa singugulière érudition, soit le premier et moderne superintendant de ladicte Église, et que Galterus Delœnus, Martin de Flandre, François de la Rivière, Richard François, soyent les quattre premiers et modernes Ministres. Nous donnons d'avantage, et concédons ausdictz Superîndant et Ministres, et à leurs successeurs, faculté, autorité et puissance, après la mort ou vacation d'aucuns desdictz Ministres, de temps en temps d'en choisir, nommer, surroguer un autre en son lieu, personne able et idoine : tellement toutesfois que la personne ainsy nommée, et esleue, soit présentée et amenée devant nous, noz hérétiers et successeurs, et qu'ilz soyent ordonnez audict Ministère, par nous ou nos hérétiers et successeurs. Nous donnons aussy et concédons ausdictz Superintendant, Ministres, et à leurs successeurs, faculté, autorité et licence, après la mort et vacation du Superintendant, de temps en temps d'en eslire, nommer et surroguer un autre en sa place, qui soit personne docte et grave. En sorte toutes fois, que la personne ainsy nommée et eslue soit présentée et amenée devant nous, et noz hérétiers ou successeurs, et soit instituée par nous ou noz hérétiers ou successeurs, à l'office susdict de Superintendant.
Nous mandons et fermement enjoignons, nous commandons au Maire, Conseillers, Eschevins, de nostre ville de Londres, à l'Évesque de Londres et à ses successeurs, avec tous autres Archevesques, Évesques, Justiciers, Officiers, et à tous noz autres Ministres, qu'ilz permettent ausdictz Superintendant et Ministres de franchement et en repos, jouyr, user,
et exercer aux leurs, leurs manières et cérémonies propres, et la discipline Ecclésiastique propre et particulière , nonobstant qu'ilz ne conviennent avec noz manières et cérémonies usitées en nostre Pioyaume, sans empeschement, trouble^ ou inquiétation d'eux, ou d'aucun d'eux, par aucun statut, acte, proclamation, injonction, restriction, ou usage qu'ilz ont eus auparavant au contraire : nonobstant quelques fais , édictZj ou proclamations au contraire. Pour tant que mention expresse aucune n'y a de vraye valeur annuelle, ou de la certitude des choses prédictes, ou d'aucunes d'ycelles, ou des autres dons, et concessions faictes aux présentes devant ces temps par nous, ausdicts Superintendant, Ministres, et à leurs successeurs. Ou par aucun statut, acte, ordonnance, provision, ou restriction faictes, publiées, ordonnées, ou proveues au contraire. Ou nonobstant quel conque autre chose, cause ou matière que ce soit.
En tesmoignage de laquelle chose, nous avons fait faire ces nostres lettres patentes. Tesmoing moy mesme à Leighes, le vingtquatriesme jour de Juillet, l'an quatriesme de nostre règne : Par le brief du privé Scel, et des choses données, par l'autorité du parlement.
J. Southwell. W. Harrys.
Extrait de Toute la forme et manière du Ministère ecclésiastique en l'Eglise des Estrangers . . . 'par M. Jean a Lasco , baron de Polonie, traduit du latin en français , et imprimé par Giles Clematius (Francfort 1556).
