CHAPITRE XII l5g

repentir si miraculeux, en tel temps, en une entreprinse pourpensée et délibérée , et devenue juste par l'usage (car d'arrivée je leur confessay ouvertement le party duquel j'estois et le chemin que je tenois), certes je ne sçay pas bien encores quelle elle est. Tant y a que le plus apparent de la troupe, qui se démasqua et me fit cognoistre son nom (j'essayerois volontiers à mon tour quelle mine il feroit en un pareil accident), me redict lors plusieurs fois que je devoy cette délivrance à mon visage, liberté et fermeté de mes parolles, qui me rendoyent indigne d'une telle mes-adventure, et me demanda asseurance d'une pareille. Il est possible que la bonté divine se voulut servir de ce vain instrument pour ma conservation : elle me garentit encore l'endemain d'autres dangers pires, desquels ceux cy mesme m'avoyent adverty. Le dernier est encore en pieds pour en faire le compte; le premier fut tué il n'y a pas long temps.

Si mon visage ne respondoit pour moy, si on ne lisoit en mes yeux et en ma voix la simplicité de mon intention, je n'eusse pas duré sans querelle et sans offence si long temps, avec cette liberté indiscrète de dire à tort et à droict ce qui me vient en fantasie et juger témérairement des choses. Cette façon peut paroistre avec raison incivile et mal accommodée à nostre usage; mais outrageuse et malitieuse, je n'ay veu personne qui l'en ayt jugée, ne qui se soit piqué de ma liberté, s'il l'a receuë de ma bouche : les paroles redictes ont autre son et autre sens. Aussi ne hay-je personne, et suis si lâche à offencer que, pour le service de la raison mesme, je ne le puis faire ; et lors que

l6o LIVRE TROISIESME

Toccasion m'a convié aux condemnations crimineles, j'ay plustost manqué à la justice. A moy, qui ne suis que valet de trèfles, peut toucher ce qu'on disoit de Charillus, roy de Sparte : a II ne sçauroit estre bon, puis qu'il n'est pas mauvais aux meschants. » Ou bien ainsi, car Plutarque mesme le présente en ces deux visages , comme mille autres choses , diversement et contrairement : « Il faut bien qu'il soit bon, puis qu'il l'est aux meschants mesme. » Comme aux actions légitimes, je me faschedem'y employer quand c'est envers ceux qui s'en desplaisent; aussi, à dire vérité, aux illégitimes, je ne fay pas assez de conscience de m'y employer quand c'est envers ceux qui y consentent.