PREMIÈRE PARTIE

leur sabbat un samedy, que le signe de la croix nest quun gibet et quon ny devoit faire nulle révérence, que les messes de Requiem nestoient de nulle valeur aux trespasses, et autres plusieurs hérésies.

Et après la remonstrance fu l'ait condempnation en la manière que suit, prime de ceulx qui point navoient soustenu ne voloient soustenir entièrement leur oppinion, dont les noms et les causes sont ci après.

Prime.

Simon Bccquet qui soustenoit et estoit doppinion de faire au samedy le sabbat, m mois en quartre condempne.

Jehanne Fourdine disoit que leauwe benoite nest de aucun plus grand effet que lauwe dun puch, condempne vu ans.

Jehenne Rose, femme dudit Simon Becquet, qui soustenoit que le sacrement de lautel que le prestre célèbre nestoit rien que abus, condempne sept ans.

Guillaume Lancrin pour avoir non creu le Trinité et que Notre Dame avoit eu plusieurs enffans avant notre Seigneur Jhesuchrist, condempne xv ans.

Jacques Becquet, fil dudit Simon, pour avoir este asseure plusieurs hérésies par especial que leauwe benoite nest que abuserie creu, condempne ix ans.

Jelienne Becquet, fille dudit Simon et sœreur dudit Jacques, pour avoir publie, oy dire, creu que les messes de Requiem ne valoient rien aux trespasses, que le sacrement de la messe nest qnabus, a este condempne xn ans.

Tassart Fourdin qui avoit un livre par lequel il ne croioit point au sacrement de lautel, que leauwe benoite est abbus, fut condempne a mettre ce livre au feu et ars devant lui, a xv ans en cartre.

Gilles des Angniaulx pour avoir jure fraternité de hérésie avec ses compagnons de non accuser lun lautre, porte un livre heretical lequel de nuit il lisoit aux assemblées quils faisoient pour eulx mouvoir, et creu les choses dessusdites, fu condempne de mettre le livre au feu de sa main ars devant luy, et en cartre perpétuelle, au pain et lieauwe de doleur.

Jehan Fourdin pour avoir dit quil ny a saint ni saintes en paradis, que la croix vraye nest que un gibet, quon ne doit point faire signe de la croix ne le honorer, condempne comme le précèdent, et les deux condemnes perpétuellement leurs biens confisquiez.

Apres laquelle condempnation faite contre les dessus nommes qui sestoient revocquiez et prie de grâce, fu mi a ceulx et a chacun deulx, excepte des deux condempnes perpétuellement, croix gaune et attachiez a leur poitrine devant et derrière, et puis les fît on mettre a genoulx devant Monseigneur levesque et ledit Monseigneur levesque et linquisiteur De Ramons les bastirent sur la tète, disant chacun escriptures par manière de punition.

Sensuit les noms et les causes des condempnes a mort, pour ce que autrefois avoient enchéri quils soustenoient leur mauvaisetie.

Pierre des Catoirs qui soustenoit la croix estre un gibet, quon ny debvoit faire nulle révérence et que Notre Dame avoit eu plusieurs enffans, quon ne le devoit nient honorer.

Jehan de Bâillon qui avoit parle contre Notre Seigneur et Notre Dame.

Hennequin de Langle, pour faire le sabbat le samedy et autres causes, fut par Monseigneur levesque dégrade de sa clergie en tondant ses cheveux dune forchette, et avoit un drap autour du col en luy hostant et dépouillant de sa clergie, et lisant les mots a ce pertinent que ne devoit jouir du privilège.

Gille Nepveu pour avoir soustenu que leglise nestoit que un manière de bordel quon paroit pour avoir largent ainsi que une fillette, que les représentations de Dieu, de Notre Dame et saints et saintes estoient pour abuser, que ce nestoit rien des prestres, et que a eulx on ne devoit confesser.

Bertoul Thurin pour avoir fait le sabbat en samedy, non croire au sacrement de leglise, a trait plusieurs a la fausse loy eulx remonstre par Escripture.

Catherine Mainarde qui par xxxn ans avoit garde faux livres, les leu a plusieurs, fait croire n ses enffans que Notre Dame avant Notre Seigneur avoit eu plusieurs enffans, filz, filles et autres choses, induit plusieurs que sils alloient a leglise et si on celebroit quils regardassent ailleurs, que sils prendroient de liauwe benoite dun doigt que lautre lexcusit, que le batesme, confession nest rien ; les livres ars devant icelle et disant aux autres nommes : nous navons a endurer que deux heures et mourir vraye martir.

Jehan Cornu pour avoir parle de la révérence de Dieu notre Créateur, de la benoite Vierge Marie et tant de maulx que pitié, lu dégrade comme Hennequin De Langle, et a tous les dessus nommez fu mis mittrc pourtraicte de représentation de diables.

Apres laquelle sentence ainsi rendue, fu lun diceulx ars a la Justice de Monseigneur levesque prestement et eut repentance priant quon ne voulsit mie croire ains quil avoit fait, et les autres furent rendu a la Justice laye de Douay et menez lendemain a Douay, excepte un condamne perpétuellement qui pour aucunes causes demeura et illecq fu preschie et ars, et sestrangla la dite Catherine elle mesme sans repentance comme on dit. Et pendant leur mort et preschement, le hourt de Douay cheut, et furent bleschie plusieurs notables clercs, et y eut dessous qui avoient les gambes et bras rompus jusques xm dont les aulcuns moururent qui fu un grand pitié et ineschief, et co par faute du vieux bois dont estoitfait le hourt.

Archives du Pas-de-Calais, Registre BB 6, f° 9.